Dubara Bocótígorá

Dubara bocótígorá óil dé ekkán dec ziyán ót rifúji ókkole sáara tuaí loiye íiyan óttu tará ré basí loi óinno ekkán dec ziyáné mani loibólla razi íiyan ót foóñsáidon. Iiyan or fúañti emouka gán asé dé kí dubara bocóti goréddé decót ahéríttu ek zon kudurotir diya decóitta óiáibo.

Lékín, dubara bocótígora gán duniar rifúji ókkol or srif ek híssa ye faá zaráttu ehól gan becí zoruri. Tamám duniar rifúji ókkol óttu cóthora ek zon óttu hom mancóre dubara bocótígorá záa. Dubara bocótígorá zorurot óiye dé rifúji ókkol or taádad ólla dubara bocótí gorár zaga ókkol neháyot hom. Iiyan nutgorá zoruri dé kí:

  • Dubara-bocótígorá ekkán hók nói. UNHCR ré rejisthar goróon yáto refújir tobka monzur goróon maaní yián noó dé kí, uggwá mancó ré dubara-bocótígorálla háwala goribó.
  • Dubara-bocótígorá gán bicí komzur refújilla ekkán héfazot or zoriya hísafe taibo. Múmkin óibó dé dubara bocótígorálla basí lói zoma doón nán enfóradi héfazot or zorurot or uore darmudar.
  • Dubara-bocótígorár báfa-sintalla, keis ekkán zomaditeé bicí ciz or uore darmudar, zçé cámil asé enfóradi héfazotor zorurot or sóktíhálot, héfazoti maahóul, girós dec or hálot ar dubara-bocótígoráll asé dé zaga ókkol.

Zodi tuáñré dubara-bocótígorállá foóila bar basíloyé de oilé, Deri Tiketákar Hóltuadé Yunít yáni DSU torfóttu tuáñre telifún lói taaluk gorítfáre, zodi dubara-bocótígorár karwaiyir laayek or cek gorá fura-gori bólla aró maalumat ókkol zorurot óiye dé óile.

Dubara-bocótígorár Intarbyu

Zodi tuáñré dubara bocótígorár karwaiyilla laayek faá giyé dé óile, tuáñré dubara bocótígorár intarbyúlla daka zaibo. Usúl hísafe, tamám intarbyu UNHCR ót manúic dí goríbó. Gair maamuli hálot ót, tuñí onlainintarbyúlla ekkán dawotnama faiba. Tuáñr dubara bocótígorár intarbyúr epoainmén or hóbor zanaibólla tuáñré koóldibo dé thaim ót, tuñí onlainintarbyu góittó nosóo dé óile DSU ré zanai faribá. Íiyan ólla bóli, tuáñr duara bocótígorár intarbyúr karwaiyir baabote UNHCR or báfa-síntar notizat honó bura asór noforibó.

Zodi tuáñré uggwá onlain duara bocótígorár intarbyúlla mokrór góijje dé óile, duara bocótígorár intarbyu goré dé UNHCR stáf membór ré koól or móksút or uore ar duara bocótírgorár karwaiyir aám nozoriya ekkán báittá góri hoi deháibó. Tuñártú, aró fákka goróon sáa dé kí, tuñi ekkán héfazot or zagat asóné, zeçé tuñár hósusiyot ar raaz ókkol héfazot táke. Zodi tuñártú UNHCR ot tuñár habosfonna zoma dibólla zorurot óiye dé óile, tuñaré rastadahái diya záibo.

Meérbani-gori, tuñár dubara-bocótígorár duróttu tái gorédde intarbyu ré awaz yáto video rekódh nógoijjó. Íiyan ekkán raaz báiñge fán óiboo ar UNHCR e soktir sáñte nozordi saibó.

Dubara-bocótírgorár Intarbyúr Baade

Dubara-bocótígorár intarbyúr baade, tuñár háalot oré díyandi nozorsáni gora-záibo, ar ekkán fáisela luazaibo wánor uoré, dubara-bocótígorái bódé ekkán decór báfa-síntálla habosfonna túlon saané.

Zodi tuñí UNHCR ót duara bocótígorár intarbyu uggwá faiyó dé óile ar tuáñrtú súwal tákilé yá hándani buniyat or tóbdil ókkol/ hálot ókkol or dóilla maalumat apdéit goribór ereda goródé óile, meérbanigorimlsmlsludsu@unhcr.org ót ekkán email foñósó. Lékin, meérbanigori iiyan kíyal rakíbá dé kí becá-becí email faá giyé dé íiyan ólla UNHCR re zonfoti email or juwab dinofaré. Meérbanigori, ekdhoilla email UNHCR ot beec bar noó foñósayó, kiyólla hoilé íiyané karwaiyi ré aró deri goríbó.

Zodi tuñi dubara-bocótígoribólla keis zomadi felaiyó dé óile, DSU torfóttu yáto dubara-bocótígoráibó dé decé tuñare aró bicí maalumat di bólla, tuñar lói taaluk goríbó.

Dubar-bocótígorá dé dec ókkole tarár síyásot ar kaanun moziin dubara-bocótígorár ezin doón saá né hói, ahérittú fáisela goré,

Zodi ekkán keis ore “America” ré zoma diyé dé óilé, tuáñr karwaiyir hálot ore nise aséde Dubara-bocótígorár Hémayot or Morkoz yáni (RSC) loi tuñi sek gori sai-fariba,

Eméil: KL.Inquiries@rescue.org

Telifún: +603 2141 5846

Fax: +603 2144 8716

Web portal CASI.

Zodi ekkán keis “Canada” ré zoma góijje dé óilé, tuáñr keis or hálot ore “Immigration, Refugees and Citizenship Center” or web forom estemal-gorí tuñi cek gori sai-fariba.

Rowanar Age Entezam ar Dubara-bocótígorá dé ekkán Decót Sófor

Híjrot gorár Dec-bidecór Tonzim yáni (IOM) e rowanar-agor zoruri entezam ókkol bondubos goré, zéçe sehét cekgora ar salsoloon uzugorá, gosí féllé dé refújlla dobara-bocótígoréddé dec ót sófor or entazam gorá yó camel asé. Zodi tuñare dobara bocótígoráddé decé gosí féillé dé óilé, Híjrot gorár Dec-bidecór Tonzim yáni (IOM) é tuáñre taaluk goríbó, zehón sofór or hédayot noma toiyar óo. Zodi tuáñré duara bocótígoráibólla kobulgóijje dé óile ar ruwanar agor bondubos ókkol yá sófor or baabote súwal áse dé óile, tuñí IOM Kuala Lumpur loi iomkulinq@iom.int ót taaluk goró yá +603 9235 5400 koól góro.

Kessú Súal Asé?

Aró bicí maalumat ollá, merbanigorí Dubara-bocótígorár uore Bar-bár Fusár gorá giyé dé Súal ókkol (FAQ) ot zai soó.