Mukómmol Rasta Ókkol
Mokómmol rasta ókkol óil de refúji arde sáara-tuwouya ókkol ólla duara bocótígorár bairé tesára dec ekkán ót góli ore táki bólla héfazot ór rasta ókkol. Fóttí ek decé éndilla mouka ókkol or zoriya loi kobul goríbólla tarár nizor corót ókkol lagaiyé. Refúji ar sáara-tuwouya ókkole UNHCR or háwalar zorurot sára darík dorháas gorífaribó. UNHCR or kirdaar óil de sóiyi né cékgorá giyé dé mouka ókkol, corót ókkol arde dorháas or karwaiyi ókkol or maalumat fóilon. UNHCR re emouka ókkol ólla mancóré hawala nóde yá dorháas ókkol or karwaiyi nogoré.
Becíbág mukómmol rasta ókkol ólla tesára decót bocótígoréddé ek zon fémilír membór yá fúñaijjáttu ekkán dorháas diya curugorá zoruri. Zodi tuñí ekkán háas rasta yá program ót mondiyó dé óile, tesára decót tuáñr taaluk asé dé íbaré ítarár decór hókumot yá refúji ókkol ore modot goré dé gair-hókumoti tonzim(NGO) ókkol lói totaaluk gorí saibólla aros goró. Zodi dorháas ekkán zoma diya giyé dé óile, émutaálek émbasi/ hai comicenar or torfóttu modot soó.
Fémilí Duara-éttefák-óon
Lamattú liís gorá giyé dé dec ókkole refúji ókkol ólla fémilí duara éttefák óibor mouka deé. Zodi tuáñrtú tuáñr egena ek zon nisóttu asé dé dec ókkol or bútóttu zehonó ekkán ót asé dé óile ar tuñí uggwá fémilí duara éttefák óonor program or zoriya tarállói mili bólla tará tuáñré hóndila gorí modot gorífáribó dé íiyan záinto soó sé óile, aró maalumat ókkol faibólla émutaalek dec or nam ót kliík góro.
Refújír Program or Canadar Praivéit Sponzarcip(PSR)
Kenadar decóitta ókkol arde tarár koum ókkole Refújír Program or Praivéit Sponzarcíp(PSR) loi refúji ókkol ore Kenadat zaga fáildai zaibólla modot gorítfaré. “Canadian Government” arde “UNHCR Canada” websáit ót aró maalumat ókkol faáza.
Malaysiar UNHCR re 5 zoina grúp(G5) sponzarcíp or dorháas ókkol ólla refúji tobkar sóbut góribor aros ókkol faádde asé ziyánóm mazé 5 zon yá aró becí Kenadar decóitta ókkole yá hámicár bácínda ókkole ek zon refúji ré Kenada zaibor sponzar gorítfare yáni thiañ báñgidí modot gorítfare. Meérbanigori iiyán kíyal góribá dé Malaysiar UNHCR re éndilla sóbut yá honó ciñçí ókkol nodé. Iiyanor bodolat, Kedadar hókumote G5 dorháas ókkol loi mancór refúji tobka ré darík UNHCR lói cék gorár ham soler. G5 dorháas ókkol or fórom fura gorár thaim ót, meérbanigori yuáñr UNHCR dokumén or ekkán kopí díyo.
Australiar Húsusi Insáni Program (SHP)
Australiar decóitta ókkol arde tarár koum ókkole Australiar Húsusi Insáni Program (SHP) loi refúji ókkol ore Australiat zaga fáildai zaibólla modot gorítfaré. “Australian Government” websáit ót aró maalumat ókkol faáza.
Malaysiar UNHCR re sponzarcíp yáni thiañ báñgidí loizonor karwaiyír loi loizaifarefán laayek óiye dé refúji ókkol ore modot goríbólla “Australian High Commission” yáni Australiar émbasi loi lagatar taalukat rakér.
Tesára Decót Elom or Mouka Ókkol
Késsú mukómmol rasta ókkole refúji ókkol ore tesára dec ekkán ót nizor elom ore muúm míkka barái foríbor ejazot dei. UNHCR or Mouka Ókkol or platfóme refúji ókkol ore aála doejar elóm, eskil ókkol barón, ar fecár torkílla monzúr góijje dé program ókkol or ekkán liís diyóré modot gorér. Platfóm ót liís gorágiyé dé fóttí uggwá program UNHCR ré sóiyi né cék góijjé. Zodi tuñí Malaysiat tuáñr elóm ore muúm míkka lagatar foríbólla mouka tuaibor erada goró dé óile, eçé kilík góro.
Meérbanigori iiyán kíyál góribá dé, UNHCR re forouya fuandor vízar dorháas ókkol ólla modot nogoré. Zodi tuáñré Malaysiar bairór univarsiti ekkáne kobul góijje dé óile, tuáñr forouyar vízar dorháas goríbólla meérbanigori girós decór émbasi yá hai komicén loi taalukat goró.
Mozurír Hórkot
Aró mukómmol rasta ókkol ót mozurír hórkot yáni ham or baabote lorasorar program ókkol cámil áse. Éndilla keis ókkol ót, refúji ókkole tesára decór kumpánir torfóttu ekkán hamor ófar faá ar dec íiyan ót sófor góri gólibor modot faá.
Késsu tonzim ókkol, zéñilla nekí “Talent Beyond Boundaries” arde “TalentLift (Canada)”, ye refúji ókkol ore onlain ham or tojurbar prifáil ókkol banaibólla arde tesára dec ókkol ót ham or dorháas goribólla mouka deé. Meérbanigori núth goríbá dé kí eham or zaga ókkol kúb becí zítazitir óo.
Címanar Bairé Telen(CBT)
Aró becí kouka ókkol faite, meérbanigori “Talent Beyond Boundaries’ Opportunities” hóodé sábbat zai dekó. Ekkán háas moukar dorháas gorbólla, tuáñrtú “Talent Catalogue” ólla rejistar gorá foribó ar íiyar baade “Opportunities page” yáni mouka ókkol or sábbat wapes aiyón fóribó. Meérbanigor núth goribá dé kí “Talent Beyond Boundaries’ online platform” loi rejistar gorá arde ókkol ummítwar ólla CBT’r hédmot ókkol estemal gorá kulehale fríi.
TalentLift (Canada)
“TalentLift (Canada)” uggwá laf nogoré dé dec-bidecór ham ót luwar agénsí zibá Kenedar hamdouya ókkol ore refúji ókkol ore keraiya goribór modot goré. Dec-bidecór hamor ummítwar or grúp ót gólibólla arde eskilwalar víza faibólla, ummítwar ókkole “”talent platform” ót rejistar gorífaribó.
Núth:”Talent Beyond Boundaries’ online platform” ót rejistar gorá arde TBB yáni CBT’r hédmot ókkol ókkol ummítwar ólla fríi.
Aró mozurir hórkot or mouka ókkol decór háas websáit ókkol ót faá zaibo.
Australia: “Skilled Refugee Labour Agreement Pilot”
Germany: “Make it in Germany”
The United Kingdom of Great Britain arde Northern Ireland: ” Displaced Talent Mobility Pilot”
