Refújir Cámil

UNHCR e fáisala goré de yían ót refúji arde sáara-tuoya ókkol or nozoriya ókkol cámil goríbólla Dukkótfóijje de Mancór Zimma Loiya UNHCR (AAP) ye ekkán wada diye. Yian e fakka goré de ki UNHCR or fáisela ókkol, hédmot ókkol ar frúgram ókkole taaké refúji arde sáara-tuoya ókkol or zorurot oré mithái ar UNHCR or cómfot ókkol refúji arde sáar-tuoya ókkol ólla thiki táke de layeki notiza ókkol faibólla estemal óo.

UNHCR Malaysia’r AAP’r wadar híssa hisáfe, UNHCR e boót doilla bekgron óttu accé de refúji koum ókkol oré cámilgorí bólla, tarár celéns ókkol fúni bólla, UNHCR or hédmot ókkol arde frugram ókkol or nozoriya ar notiza ókkolor hotá faibólla kessú torika cúru góijje. Etorika ókkol ót cámil asé:

  • Refújir Mocuaradiyar Buúdh
  • Mayafuain dólla Mayafuain (W4W)
  • Duréfoñósar Blódiyar Frugram
  • Juwan or Nethwak
  • Koum ókkol loi Alafgorí (CwC) Hamgorár Grúp

Etorika ókkol loi, UNHCR e tarár hórkot ókkol ót refúji ókkol oré maaní táke éndilla cámil goróon oré baráibólla moksút banaiye; refúji ókkole tará ré tará héfazot goríbór héçam bare. UNHCR ré aró refuji ókkol ólla trainíng zari ráikké taaké tarár boddaci héçam óite loi tarár zanar elóm arde eskíl ókkol barái oré tarár héfazot or hóti óo de mosóla ókkol ólla gongóri ukilgiri gorífare.

KÍYALGÓRAIDIYA!

Meérbanigori núthgoríba de ki Refújir Mocuwaradiyar Buúdh Membór Ókkol, Durézai Hamgorár Bolódiyar Ókkol arde uoror tarika ókkol or menbór ókkol:

 

  • UNHCR or nomaindagiri arde UNHCR or bodolat hamgoróon or honó ektiyar nái.
  • Refúji ókkol oré UNHCR or honó hédmot gorár ektiyar nái.
  • Refúji ókkol ólla jolti hédmot loon yá hédmot ólla tuwájju doonor honó ektiyar nái.

Refújir Mocuaradiyar Buúdh

Malaysia’r Refújir Mocuaradiyar Buúdh(RAB) 2023 or Jun ót kayem óiye ze thaim ót íbar foila pailoth grúp boinne. RAB óil de Malaysia’r refúji ókkol or nomaindagiri gore ar íbat tojurbawala refújir liídar ókkol yá kisímma-kisímma bekgrón óttu accé de matáwala manúic ókkol asé zeçé doila-bodoila boc oe manúic, decóitta ókkol, koum ókkol, jíns arde fecáwala manúic cámil. RAB ye Malaysia’t asé de ókkol refúji koum or uggwá sólluk or awas hásafe hamgore; Malaysia’r ókkol refújir héfazotwala mahóul or torkigorí bólla nomaindagiri gorár kucíc oré zurlagai mosbutgorí barái oré honókiya fisé fori notákefan fakka goróon.

Tará ki goré de?

  • Refúji ókkol or awas oré UNHCR or fáisela ókkol ót, hédmot ókkol ót arde Malaysia’r frugram ókkol ót báfizaiólla fakkagore.
  • Refúji ókkol or fáida arde héçam oré baráibólla frojék arde frugarm ókkol ót ókkol taalluki cíyardar ókkol loi mili hamgoróon.
  • Taalluki cíyardar ókkol loi refúji ókkol or buniyadi zorurot ókkol arde Malaysia’r refúji koum ókkol or furafuri héfazotwala mahóul torki goríbar ukilgiri goróon.
2023/2024 or RAB grúp e nizor muddot hótom góijje. Tará UNHCR oré modot arde refúji koum ókkol ólla kurbani diyé de yían ót UNHCR e tarár cúkuriya góijje.

2025/2026 Cón or Nuwa RAB Grúp

Nuwa grúp gwá foila Januari 2025 ót cúru óibo ar 31tarík Dizembor 2027 ót hótom oibo. Nuwa grúp oré kúla dorháas or torika loi ereda zahérgóijje de manúic zaráttu miyatwala UNHCR Malaysia’r dokumén asé tará ré loi kayemgor’giye

Zodi tuáñrtú dorháas dibólla mon asé de óile, meérbanigori eçé kilíkgoro.

2023/2024 or RAB Grúp e Goijjé de Ham ókkol

  • 2024 fefuari 27 tarík ót, UNHCR or Asia ar Pacific Elakar Dairekthar loi dola óiye.
  • 2024 Mee mac or 27 tarík ót UNHCR or Asia ar Pacific ólla Hékmote Amóli Plan arde Entezamgorár Elakar Boro loi dola óiye
  • Thaime Thaime Macór Míting
  • Ukilgirigorár Threnníng
  • Liídarigorár Threnníng
  • 11 Jun 2024 ót Tzu-Chi Kliník ót math sófor
  • UNHCR or Sehéti NGO Paáthnar ókkol or Milihamgorár Míthíng ót Úitthe
Refújir Mocuaradiyar Buúdh loi Taalukgótte, meérbanigori ekkán email foóñoso: refugeeadvisoryboard@gmail.com

Núth: E emial iba RAB’r membór bonibólla dorháas dibólla noói. Email ibá loi dorháas aiyér de óile añárar bába-sínta nogóijjoum.

Mayafuain dólla Mayafuain (W4W)

Mayafuain dólla Mayafuain (W4W) néthwak kwá refújir mayafuain dólla ekkán héfazot asé de zaga hísafe 2023 ót kayem gorágiye, taaké UNHCR or fáiselat mayafuaindór nozoriya ókkol fúni oré biyassana goráza. W4W ré mayafuaindór liídar ókkol arde refúji ye salai de grúp ókkol, elóm hána ókkol, doila-bodoilla decóitta arde koum ókkol óttu bolódiya ókkol loi oré kayem gorágiye. E plathfom gan refúji mayafuaindór héçam torkir plathfom hísafe hamgore taaké tará tarár koum or menbór ókkol oré modot dibólla toiyar ar taakot wala bone.

Asól Mogsót Ókkol:

 

  • Mayafuaindór taalluki mouzú arde dúrsintar uore zanai don
  • Héçam torki arde nizoré torki goróon or pláthfom
  • Cóoroh bodolabodoli arde sómaji hamhoros ór asán óofan goróon
  • Mayafuaindór cámil góron oré mosbutgoróon ar refújir liídargirír súrot ókkol ót mayafuaindór cámil óon oré baróon

Agor ham ókkol:

 

  • Cóoroh cíargorár boiçók
  • Fémilír plangorá arde baccadanir kensar or elómdiyar boiçók
  • “Canva arde Microsot PowerPoint” threnníng or doilla eskil threnníng ókkol
  • Dec-bidec or Insániyot or Kaanun, mayafuaindór hókk ókkol, fuaindór hélaf cáhawóti jrúm ókkol arde górgwá danga-fósat or threnníng ókkol

Duréfoñósar Blódiyar Frugram

Durézaihamgorár Bolódiyar Frugram gwá Malaysia’t asé de refúji arde sáara-tuoya ókkol, háasgori zará Kuala Lumpur arde Selangor or baáré táke tarálla maalumat barái oré foon or cúrur moksút loi 2022 ót kayem óiye. Durézaihamgorár Refúji Bolódiya ókkol oré UNHCR e threnníng de ar tará salu asé de ekkán kirdar adaigore.

 

  • Tarár koumor membór ókkol or súwal baade hédmot arde modot or buniyadi maalumat ókkol diyon
  • koum mancóre Refugee Malaysia wébsáith arde tar onlain súrot ar fórom ókkol háselgorár modot diya
  • Koum or mrmbór ókkol loi maalumat cíargorár boiçok ókkol goróon

Septhembar 2024 fóijjonto, kisímma-kisímma decóitta ókkol ottu salu asé de éndilla 137 zon durézaihamgorár bolódiya Johor, Kedah, Kelantan, Kuala Lumpur, Melaka, Pahang, Penang, Perak, Selangor, ar Terengganu elekat asé.

Zodi tuñí Durézaihamgorár Bolódiya óito sóose óile, meérbanigori nisor sorót gin soó. Baade, tuñí Durézaihamgorár Bolódiyar Dorháas or fórom loi dorháas gorífariba.

Monot Rakóo

UNHCR or ókkol hédmot maana

Refúji yá sáara-tuoya ókkol or duara dúkabazi arde marihóon or cíkar óiyo de óile, meérbanigori UNHCR or Hótora, Imandari arde Nozordarigorár Thiím (RIOT) oré nisor zehó ugwá torika loi repouth goro:

  • Intharnéth óttu Bisardede Fórom(Fókkorai ar Dúkabázi)
  • Ímeil RIOT: mlslufrd@unhcr.org

Zodi tuñí refúji elóm hána ókkol or yáa koumor tonzím ókkol estaf, koum or liídar ókkol or koum or muróbbi ókkol or, yáa durézaihamgorár bolódiya ókkol or honó cáhawóti marihóon arde bodsóllukir kies asé de yían or cubá asé yáa sintat asó de óile, meérbanigori daárík “Women’s Aid Organization(WAO)” yáani Mayafuaindór Modoti Tonzím zibá UNHCR or paáthnar ar cáhawóti marihóon arde bodsóllukir repouth ókkol loó tará ré repouth goro.

  • WAO hótláin: +603 3000 8858 (Cómbar óttu Cúkkúrbar– beinna 9 wáttu ázinna 5 wá bazefan, Cónibar óttu Roibar – beinna 8 wáttú ázinna 4 gwá bazefan)
  • SMS / WhatsApp TINA: +6018 988 8058 (24 góndha)