Zindigi Gorár Zoriya Ókkol
Nogot Thiañr Modot arde Hamor Zagar Modot
Nogot Thiañr Modot
Gair maamuli mamala ókkol ót, UNHCR e alfo miyadi nogot thiañr modot goríbólla duwá paáthnar NGO loi hamgoré, ar modot íin neháyot durbol refúji arde sáara-tuwouyar fémilí ókkole faá zaráttú tarár buniyadi zoruri metháibor honó dusára ektiyar nái. É NGO Tzu-Chi Foundation (TCF) arde Malaysian Relief Agency (MRA), ye UNHCR e efémilí gun óttu zorurot hói antaz góillé modotgoré ar oi mancóré nogot thiañ’r modot goré zaráttú becábecí zoruri.
UNHCR e lamba miyadi modot gorí nofaré. Nogot thiañr modot gan toitta. Laayek fémilí ókkole tarár buniyadi zorurot ókkot mitháibólla aámbáfe ek óttu tin mac fóijjonto modot faá. Keéc thiañr modot elac or hóros ókkol ólla nofaá, lékin operecén or hóros ókkol yá hóspitel or maali modot or uore maalumat faibólla meérbanigori sehétí hédmot or sábba gan foróo.
UNHCR e modot or aros ókkol refúji arde sáara-tuwoya ókkol óttu daárík gosé yá paáthnar ókkol, hédmot goróioya ókkol, arde refúji koumor tonzim ókkol or háwala loi gosé. Zodi tuáñrtú honó rasta náide óile, tuñí onláin fórom ibá zoma gorítfaro.
Aros ókkol oré boút hákhikot ókkol or uore daramudar gorí góijje dé antaz ókkol lói tuwájju diaza, zeçe fémili gwár hamanir héçam, háas zorurot ókkol, fémilír saiz arde arjén zorurot ókkol cámil. Ókkol aros oré antaz gorá nozá. Agór añárar patnar ókkol or torfóttu dui macór bútóre honó juwab nofailé tuñí iiyan kíyal ót áníbádé tuáñr aros uore árhonó antaz gorá nozaibó, ar tuáñré honó nogot tiñyar modotó gorá nozaibó.
Zodi tuáñr dorháas san or antaz lagai saár de óile, tuáñré TCF yá MRA ye taalukgorí aibo. Tará íyar baade antaz lagai saibólla ekbar gór ót saitó aibólla bonbos goríbo. Zodi COVID-19 or hálot nazuk óor de óile, antaz lagai soón or ham gan gór ót noaí oré fún loi gorítfare.
TCF arde MRA ye tuáñr gór ót aái tuáñr zindigir halot arde tuñí mukabela goródde cellenj ókkol or baabute uggwá muktosor intarbyu goríbo. TCF yá MRA ye tuáñré intarbu gorí antaz lagai yé de íyan or notiza ré ek macór bútor zanaibo. Zodi tuñí kec thiañr modot foon or laiyek de óile, kec thiañ dibollá dola óifarefan tará tuáñré uggwá epoáinmen dibo. Tuñí zodi kec thiañr modor faibor laiyek de íyan loótfaiyé de óile, paáthnar or torfóttu tuáñré aró zanai aibo.
Zodi tuñí kec thiañr modot faiyó de óile, yá tuáñr keis oré age antaz lagai saái oré tuáñré modot donor layek nóofa ar tuñí abbar dorháas dibólla soor de óile, tuñí nuwa dorháas gorí fariba. Tuáñré dusára ekkán or layeki antaz lagibólla háwala gorítfare, lékin oinno refúji arde sáar-tuwoya ókkol zarár hálot oré antaz lagaibór aros ehóno táigiyó ítararé witaráttú bare tuwaijju dia zaibi zará age modot faiye yá tarár aros oré age antaz lagai saáil.
Agór tuáñré nogot tiñyar modot fonor nakaabil hói age antazgóijje dé óile, tuáñr noiya dorhás ore ar antaz nolagaibó zodi zindigi yá sehéti hálot hóraf óon yá amodonir núksan óiye dé índilla tuáñr zindigir hálot ót honó ahám bodol nóo dé óile.
Uggwá Beéng Ékon Kúla
UNHCR ré refúji arde sáar-tuwoya ókkol ólla beéng ekoun kúli nofare. Refúji arde sáara-tuwoya ókkole daárík beéng ót dorháas dibólla zaáforibo, lékin beéng ót nisortú diya asé de dokymén ókkol deháforibo.
- Sómac or uore miyat wala orijinal UNHCR or kaád.
- Nisor templéit yá nomuna mutafek, tuáñr hamdouyar torfóttu modot goré dé ciñçí.
- UNHCR or torfóttu modot goré dé ciñçí
Beéng ekoun or dorháas goríbólla hamfaiyó de íyan or sóbut hámica zoruri. Zodi tuñí íyan dehái nóo farode óile, tuáñtú beéng ót zai oré oinno modotgari dokumén ókkol dilé faribo né cek goráforibo.
Ókkol beéng e refúji arde sáaratuwoya ókkol oré beéng ekoun kúlibólla ejazot nodibó, lékin CIMB beéng e refúji arde sáara-tuwoya ókkol or torfottú enfóradi dorháas ókkol oré báfasinta gorítfare. Tuáñrtú tuáñré hamdouyar beéng ekoun zeçé asé ébeéng ót zai soónsa, yá oi beéng bránc ót zai soónsa ziba tuáñr ham or zaga yá gór loi oré hañsé. Tuáñrtú beéng or kountar ót zai-zai oré inquáyari gori-gori eén uggwá beéng tuawon zoruri zibá ye tuáñr dorháas san gosíbo.
Tuáñr dorháas oré gosón arde inkargorón nan siríf beéng or bránc loi darmudar. UNHCR e karwaiyi iyan ót modot gorí nofaríbó. Zodi uggwá beéng bránc e tuáñr dorháas oré inkar góijje de óile, tuáñrtú oinno bránc or baabute báfonsa, yá gair beéng or maali hédmotdouya ókkol or ektiyar or hotá báfonsa. Hoi-uggwá gair beéng or maali hédmotdouya asé zuún “Central Bank of Malaysia (BNM)” or matahátít sole ar tará “e-wallet” ókkol arde “VISA” yá “Mastercard prepaid cards” or doilla hédmot ókkol zañse.
Meérbanigoríforóm ibá furagoró zodi tuñí uggwá beéng ekoun kúlibólla ekkán UNHCR or modotgari ciñçír aros goró dé oile, yátoba zodi tuáñrtú beéng ekoun asé ar beéng loi asé dé mosóla gan hólgóribólla UNHCR or modot zorurot óiye dé óile, meérbanigori beéng branc or taaluki maalumat zendilla nekí beéng estaf or nam arde email thíkana doó.
Hamor Zagar Mosála Ókkol
UNHCR, doila-bodoilla patnar ókkol loi hamgoré, taaké óimanúc ókkol ore modot gorífáre zaráttu hamor zagat yá hamot hózzia ókkol asé zéndilla nekí:
- Tuñí góijje dé hamor tiñya tuáñré tuáñr hamdóuya yé nodér
- Tuáñr hamdóuya yé tuáñr tolóf or tiñya óinniái báfé haçér
- Tuáñr hamdóuya yé tuáñré honó bála wajá sára ham óttu neláider
- Tuáñré tuáñr hamdóuya yé jisími yá zehéní báfé zulúm goré dé óile.
- Tuáñr hamdóuya yé óinno ziníc or bodolat tuáñr UNHCR dokumén ókkol rakídí tuáñré wapes noder
Agór tuñí tuáñr hamor zagat endilla móckil ókkol or mukabela goródde óile, yá mozurír mosólar uore mocuwara lagér dé óile, tuñí nisor hédmot dóiya ókkol or hañsé záitfaroó.
Hotlines: +60322015438 / +60322015439 / +60172094059 (WhatsApp)
Operating Hours: 9:00am-3:00pm, Monday to Friday
24-hour Hotline: +6012 335 0512 / +6012 339 5350
Zodi tuñí tuáñr hom or giróssor hátót nuksan óiyo de óile, tuáñré fulíc repouth goríbólla hóusala diyazar. Zodi tuñí morotmaiyar-danga-fósat or cíkar yá tuáñr ham or zagat botsóllukir cáikar óiyo de óile, faáza de modot ókkol or baabute zanibólla meérbanigori morotmaiyar-danga-fósat or sábba gwá foróo.
Zodi tuñí ékzon hémot dóuyar hañsé zoó dé óile, iiyan modotgar hísabé sábut óibó zodi tuñí ham or maalumat ókkol difaroó, zéndílla nekí:
- Hamor zímmadari ókkol
- Kúmfáni yá hárbar or rejistar nam
- Hamdóuyar nam ar taalukat goríbor nombór
- Hamor zagar tíkana
- Ham cúrú arde ham bon góijje dé tarík
- Macé hodin cúttí ar háfta yé hogónda ham
- Tolof hodún ar OT’r reit hodún
- Kúmfánit ham goróiyar taádat yáni hamgoré hotó zon
Tuáñrtú tuáñr ham or taalukat asé dé habosfonna ókkol rakíbor kucíc góronsá, zéndílla nekí:
- Hamor kontrak
- Tolofor sílif
- Ején or taalukat gorár nombór
- Thaimkaád
Harbar ókkol or maalumat
Malaysia’r harbar ókkol ót aksér fusár loo dé ki UNHCR or foriso dokkumén gan hamgorár parmít hísafe hamgoré né . UNHCR or foriso dokumén nan siríf ekkán moksút or hamgoré: des-bidecór héfazot ólla uggwá refúji yá sáara-tuwoyar zorurot oré sinón arde émanúic cwá ré íbar orijinel dec zeçé íbar azadi ar foran or hóti óitfáre éçé wapes nodibólla héfazot góron. UNHCR or foriso dokumén nan gañrí salaibór laisen, yá sóforgorár dokumén, yá tákar hók, yá hamor parmít hísafe ham nodé. Tará edokumén dóroiya ré kaanun óttu maaf nodé.
UNHCR or forisoi diya kaád ókkol zehonó kíya UNHCR Verify Plus mobail app ót, nisor dáf ókkol lói háñsá né cék gorífáré:
- Google Play Storeyá Apple App Store óttu “UNHCR Veryfy Plus” tuái loi donlúd góro
- Tuáñr “email ID” loi “Sign in” goró
- Háté táka asól UNHCR kaád or deházár dé QR koud or míkka kemera ré icára góro ( UNHCR kaád ore éskén góra kopi yá fotúkopi gán éskén yá fotúkopi góijje dé íiyan or gunor uore darmudargori ham noóit fáre)
- App ót deházár dé tofsil ókkol UNHCR kaád ót asé dé tofsil ókkol lói mil asé kí ná cékgoró.
Verify Plus App oré estemal gorí UNHCR or foriso dokumén nan sóiyi né cekgoríbár siríf ekkán rasta. UNHCR e enfóradí báfe UNHCR or foriso dokumén ókkol forók-forókgóri sóiyi né cekgorí nofaré.