Refúji okkól ollá Hól okkól

UNHCR or zimmadarit, tesára decót zaitókiyot oibár baabote hobórbatri ré añí hoçé tuai faiyumde?

UNHCR or Resettlement Handbook e, UNHCR or torfottú bidecfoóñsoon ór folósi ar niyomor hóborbatrir uore tofsilgorí hoóidiyé. Refúji goséde dec ókkol é tarár folósi ar furugeram ókkol óre nizor Decór Cepthar ókkol ót hoiyé. Resettlement Handbook óilde uggwá áam manúic ór habosfonna ar ibá ré tuai faa zaibou: https://www.unhcr.org/46f7c0ee2.pdf liínk ót
Bidec difeçái bellá hon-hon kisím ór keis ókkol zomadede híin óre UNHCR or Resettlement Handbook ór Cepthar 6 (Sóo)’t maze buzái hoiyé. Tuúñi e cepthar óre nisor liínk ór uore tip mariyoré forí faribá: https://www.unhcr.org/3d464e842.html

UNHCR ot Durable Solutions Unit (DSU)’r zañsai goredé theból (yáni mes) óre hon din ókkol ót kúle de?

Durable Solutions Unit (DSU)’r konthar óre hámicallá bongorí diyagiyé. Añár tuáñra ré sobór gorí bellá aros gorír kiyóllá bouli hoilé UNHCR re zañsai ókkol soóñlibar entezam óre aró asór goréde torika lói torki goríbellá saár.

Durable Solutions Unit óre añár keis or baabote mocuwara gorí bellá keén gorí zukazuk goittám?

Ofís ót fottí zon-zon aiyóon, ciñçí ókkol, féeks ókkol yáto iméil ókkol héçe difeçóon ór zorurot nái. Zeén óibou óuk goi, tuáñr zukazuk or tofsil di rakóon nán óilde becí zoruri – telifún nombór ókkol (meérbanigorí tuúñi Whatsapp estemal goróo né nogoróo yían óo hoiyóu) ar iméil ID ókkol óo UNHCR ór hañsé zanai raikkóo, taáke ofís é tuáñr lói zeéñtté lage héeñtté uggwá din-tarík (yáni apuáinmén) ór entezam gorí fare fán.

Zodi añár keis oré Durable Solutions Unit (DSU) torfottú karuwai goré ar United States of America (yáni Ameríka)’r hañsé zomade, taza hóbor ólla añái haré zukazuk goittám?

Resettlement Support Center (RSC) ye Ameríkar hókumot ólla ham goré ar refúji ókkol óre tarár bidec zaibar dorhás ókkol fura goitté Ameríkar hókumot ór adikari ókkol torfottú báfi zaibella modot goré Tuúñi Resettlement Support Centre óre +60321415846 nombór ót koól gorí yáto taráre KLInquires@rescue.org ‘it iméil di zokazuk gorí faribá.

Añár rejisthrecén intarbyu baade, añáre refúji hísafe manilua zaibellá ar bidec difeçá zaibellá hotó din lagibóu?

Manúiczon ziín UNHCR or hañsé rejisthar goijjé, hítara uggwá refújir tobka fáisela goréde karuwaiyittú far ói zaa foribóu, zibár woktót manúiccwár alomi héfazot ór zorurot ókkol ór uggwá murhaiya zañsai-básai gorá zaibou zodi e manúicwá uggwá refúji ói ne noó yían ór fáisela loibar agottú. Omanúiczon ókkol zará ré UNHCR or torfottú refúji ókkol hísafe fáisela gorá giyé, siríf hítara ré bidec zai tókiyot oibár entezam ollá báfa zaibou de. Refújir tobkar fáisela loibellá ar bidec zai tókiyot óibellá karuwaiyir thaim ókkol ekkán keis ottú ar ekkán beechom óo zodi fara zailé.

Añái añár refúji kaád gosí faiyí. Bidecót zaibar intarbyu’llá añáre hoóñtté dahaibou dé?

Ekkán refúji kaád tákoon ór maáni tuúñi heéñte bidec zai tókiyot óibellá laayek óibade noó. Aró, hotó din Malaysia’t táikkoo dé yían e yó uggwá refúji ré bidec zai tókiyot óibellá laayek no bana. Bidec difeçái bellá hon-hon kisím ór keis ókkol zomadede híin óre UNHCR or Resettlement Handbook ór Cepthar 6 (Sóo)’t maze buzái hoiyé. E cepthar gwá ré nisor liínk ór uore sibiyo ré tuúñi forí faribá: https://www.unhcr.org/3d464e842.html

Cécmeic, hodún manúic bidec difeçái faribou dé yían ór címa asé de hétollá, héfazot ór dorhari edde hótara ar bidec difeçái bár zorurot ókkol mouzin keis ókkol óre age gorá zaibou.

Añái ekkán ciñçí gosí faiyí ziyán é añáre ehón añái bidec zai tókiyot óibellá laayek noó hói zanai dibellá. Yián ór maáni ki ar añárttú ki goróon saá?

Yián ór maáni óilde ki UNHCR re tuáñr keis oré ekkán bidec zai tókiyot oibár dec ór hañsé e thaim mwát háwala gorí nofarér. Zeén óibou óukgói, yián ór maáni tuáñr refújir tobkar bodolibou dé noó. Tuúñi UNHCR or torfottú modot or khédmot ókkol ar alomi héfazot faat táiba.

Bidec zaibar intarbyur woktót, añái añár keis oré hon decót zomadiya zaibou de yían fusár loi faijjum né?

Ói, tuúñ faribá. UNHCR re tuáñr gór ór maincór moncá ar dhoilla bodhoilla gosíbou dé dec ókkol ór corthó ókkol óre báfi zaibou. E hóbor báttiri yé tuáñr gór ór maincollá ekkán zai tókiyot oibár dec óre basí loon ot UNHCR oré modot goribóu.

Añái kí añár fosón ór decót zai tókiyot oibellá aros gorí faijjum né?

Zodiyó UNHCR re uggwá refújir zai tókiyot óibar fosón ór dec óre nudh gorí loile yó, uggwá refúji ré hon decót zomadibou de yían ór ahéri fáisela UNHCR or hátot tákibou. Zeéñtté héndhilla fáisela goré, UNHCR re refúji ókkol ór honó kháas zorurot ókkol ar tarár fémelír zukazuk (yáni sinforiso) ókkol óre yó báfiza.

Añái kí añárllá basí loiyedé ekkán zai tókiyot óibar dec óre inkaar gorí faijjum né? E mouka ré inkaar gorí baade, añár keis or ki oibóu?

Zodi tuúñi honó ekkán zai tókiyot óibar dec ót tókiyot ólla nobáfibellá basí loód dé óile, tuúñi bidec difeçáibar aró karuwaiyittú tuáñre neelai félaibár hótara re loód dé. Zodi tuúñi tuáñr keis óre gosíloiyé dé ar intarbyu goijjíl hé decót zai tókiyot óon óttu tuáñr keis oré neelai félaibella fáisela goijjó de óile, UNHCR re tuáñrllói neelai féloon ór notiza ókkol ar cíyak ókkol ór uore hédayoti hotá hoibóu. UNHCR re e keis óre arekbar tuáñr fosón ór decót zomadi nofarít faré, ar yián zehonó oinno zai tókiyot óibar decór fáisela óibou, uggwá zai tókiyot óibar keis zomadoon óre báfi zaibou ne nozaibóu.

Añái añár bidec zai tókiyot oibár intarbyu ré fura góijji. Añáre zai tókiyot óibar dec loi añár intarbyu goríbellá hoóñtté daháibou dé?

Bidec zai tókiyot óibar intarbyur moksót óilde tuáñr bidec zaibar keis óre zañsai-básai goríbellá. Bidec zaibar intarbyur baade, tuáñr keis óre bidec zaitókiyot óibellá zomadiya zaibou né nozaibóu yían fáisela goríbar agottú aró ekbar duwara saá zaibou. E karuwaillá lagede thaim híba keis ottú keis loi beechom óo. Zodi tuáñr keis óre híyar baade Amérikár hañsé zomadiya giyéde óile, Resettlement Support Centre (yáni RSC) ye tuáñre RSC loi tuáñr intarbyur tarík hoibellá tuáñre zukazuk goribóu. Ameríka baddiyoré oinno dec ókkol ólla, UNHCR re tuáñre tuáñr zai tókiyot oibadé decór adikari ókkol lói intarbyur tarík ór baabote hóbor dibellá zukazuk goribóu.

Zai tókiyot oibár decór torfottú añáre zukazuk gorá nóo za. Tará añáre hoóñtté koól goribou dé?

Bidec difeçáibar karuwaiyillá lagede thaim ókkol lamba ar agorihuánoza. Yián zai tókiyot oibar decór icára ókkol, haré age gosíbou híin ór uore darmodar goré, ar UNHCR or hátor baáre.

Añái Durable Solutions Unit (DSU)’r torfottú uggwá koól faáilam, añáre zanaiyéde ki añár bidec zai tókiyot oibár keis óre ‘dóri ráikke’. Añái aró hóbor keén gorí faiyoum de?

Gufoniyota ré soóñlibar zorurot de híyan ollá, UNHCR re fottí zon-zon óre kiyólla tarár keis óre añthkai raká giyéde híyan hámica buzái nofaribóu. Keis ókkol bóut dhoillá wajá ókkol ór zoriya añthkai rakít fare. Zeén óibou óukgoi, zeéñtté wajá ré furafuri zañsai goijjá óibou, sáfgori buzáidiya zaibou ar hól ói zaibói, tuáñr bidec zai tókiyot óibar karuwaiyi ré abbár salu goríbou. UNHCR or hañsé aiyóon yáto tuáñr keis or baabote barbár fusár goillé, yián é tuáñr keis oré toratori solai loizoon ot modot no goribóu.

Añár keis oré Ameríkar hañsé zai tókiyot óibellá zomadiya giyé. Añáre 2012’t, sinforisor fókkorait cámil góra giyé. Añái ekrar goijjí ar añár keis óre thíya gárai raká giíl. Añáre hoóñtté intarbyu ar bidec difeçáibou dé?

Uitará zará sinforisor fókkorair cíyak ót baijjíl, hítararé 2019 Maarec edde Epril ot Ameríkar Department of Homeland Security (DHS) ót tofottú intarbyu gorá giíl. Tuáñr keis or uore aró maalumat ollá, meérbanigorí Resettlement Supports Centre (RSC) ré +60321415846 nombór ót koól gorí yáto tará ré KLInquires@rescue.org ‘t iméil dí zukazuk goróo.

Añái añár medhikél eskríinín gorí félli mogor añáré International Organization for Migration (yáni IOM) e aró uggwá eskríinín ollá zaito hoór. Kiyollá?

Zai tókiyot óibellá gosíbou dé dec ókkol é refúji ókkol ollá taza (yáni noiya) medhikél repouth óre dorharigorí tuwa. Refúji ókkol óre tará decóttú neeli zaibar age ekbar ottú baró becí medhikel eskríinín goríbar emkan asé, zai tókiyot oibár decór folósir uore darmodar gorí.

Kiyollá añár bidec zai tókiyot oibár karuwai etó deri lagedde?

UNHCR or héfazot aséde manúic beggún ollá bidec zai tókiyot óon oildé uggwá becí thaim háde karuwai ar karuwaiyir thaim dec ottú dec loi beec hom óo, dhoilla bodhoilla imigerecén kaanun ókkol, haçé agedibou ar nodibóu eddé entezam ókkol ór zoriya. UNHCR loi bidec zaibar intarbyu fúraiyéde thaim óite dec óttu neeli zaibar thaim foijjonto hotódin lagibou dé yián agori hoité becí mockil. Bidec zaa óibar agottú, maamela ókkol zendhilla neki fáil ót noiya fua tulá, bou-zamai tulá, feçot baicca úwa, sárasari ar fuaindór maalekana dabi gorá ar rejisthrecén, mora manúic ókkol fáil óttu haçidoon oré bála góri zañsai-básai ar thík góri luwa fore.

Añár fémelí aijó ekkán dirgó miyadi fáiselallá entezar gorér. Añái kí añár bidec zai tókiyot oibár karuwai loi muúm mikká zai faijjoum né? Añár fémelillá ki oibóu? UNHCR re zai tókiyot oibár decót añár fémelillói ekzagat dola ói táai bellá modot goríbou né?

UNHCR re fémeli re wapes ekzagat dola óoi tákoon ar modot oola rictadari ókkol óre óibella saá ar fémelí ókkol óre síra nogoré. Yián zoruri de ki tuúñi tuáñr góror rejisthar nóo goredé manúic ókkol ór baabote UNHCR oré zanai doon. Cíyak ókkol ar notiza ókkol ór baabote fémelí ré mocuwara diya zaibou.

Zodi añái uggwá gair refúji ré biyá goillé, añár bou/zamai ye ar fuainsúain dé UNHCR kaád faibou né ar añár fúañti bidec zai gói faribou né?

Uggwá gair refúji ré biyá goijje dé uggwá refújir bidec zai tókiyot óon óre UNHCR or torfottú age diyoré karuwai no goré. Zodi tuúñi uggwá gair refúji ré biyá goijjóo de óile, tuáñre tuáñr bou/zamair decót uggwá hámica tákooyar tobka yáto óitfarede, decéitta hísafe mani luwa zaibou. Uggwá gair refúji ré biyá goijjé dé bou/zamai ré UNHCR or torfottú húñciaris sáañte zañsai gorá zaibou, manúic híballá kúla aséde rasta ókkol ar fura fémelir háalot óre fáaisela goríbellá, taráre bidec zai tókiyot óibella báfibar age. Zodi tuáñr bou wá uggwá Malaysia’r decéittá óiyede oilé, Durable Solutions Unit (DSU) ye tuáñr keis oré Protection Unit (yáni Héfazoti entezam or Daáir) hañsé háwala góribóu, zibá yé tuáñr ar tuáñr fuainsúain dór decéittá boni faribár rasta ókkol óre wapes zañsai gorít fare.

Añái uggwáttú báro becí biyá goijjíi. Añár bouáin añár fúañti bidec zai tókiyot ói faribou né?

Uggwáttu báro becí biyá goróon nán refúji goséde dec 100 (cót) hára 99 ót gair kaanuni ar hétolla bóuli refúji ókkol óre bidec diya noza, zodi tará uggwáttu báro becí bou loi lagatar táaitou saá de óile. UNHCR or tofottú, fottí uggwá fémelí tarár bidec zai tókiyot oibár rasta ókkol ór baabote alok-alok gorí mocuwara gorá zaibou ar fémelittú tarár bou ókkol ar fuainsúain ollá sób sé becí bála entezam ókkol óre báfi zaibar zoruri.

Añáre ekkán refúji gosé dé dec ór torfottú baat diya giyé. Baade sárme ki óibou?

Tuáñr keis oré monzokká héñté ar ekkán refúji gosé dé decót zoma diya nozaibóu. Zeén óibou óuk gói, UNHCR re keis uggwá-baade-uggwár uore wapes zañsai gorá ré fúrai bóu, tuáñr fémelir honó kháas zorurot ókkol óre báfizaa foredde yían demak ot rakí. Refúji gosé dé dhoilla bodhoilla dec ókkol ór dhoilla bodhoilla corót ókkol ór zoriya, zodi tuáñre ekkán decé inkaar goijjé dé óile, tuúñi mone-mone nogoijjó de ki tuáñre ar ekkán decé gosí loibou.

Añáre UNHCR or torfottú eéñte ar oinno manúic ór zimmadarit bidec zai tókiyot oibár mouka duinuwá zañsa giyé. Zodi añái oinno manúic ór zimmadarit zaibellá basídde óile, añáir añár bidec zaibar mouka ré añár góror oinno manúic ókkol yáto sómaj ór membár ókkol óre difaijjoum né?

Uggwá fémelír yáto uggwá manúic ór bidec zaibar dorhás óilde, heçé bidec zai tókiyot óibella ekkán zorurot asé né nái yíanor uggwá zañsai gorár uore darmodar raké. Uggwá fémelí zibattú oinno ekkán lambá miyadi hól óibár rasta táaile, UNHCR re bidec zai tókiyot óibellá bol nodibóu.