UNHCR e uggwá mayafuar repouth faát asé zibá yé UNHCR or Rejisthrécen arde Duara-bocótígorár Yunit ót hamgoré hói dabigoré. Mayafua gwá refúji ókkol loi WhatsApp óttu hotá ókkol arde leká foñósái oré taaluk goré ar Rejisthrécen arde Duara-bocótígorón ólla UNHCR or dokumén, epoáinmem, arde intarbyu ókkol goráidibor bodolat RM2,000-3,000 fójjonto beñg ót bóridibólla hoó.
Dúkadoiya ókkole estemal gorédé fún nombór bútor zana asé nombór gun óilde 011-33321567 yá 011-16560601. Mayafua gwá yé manúic ókkol ore zana dé ki, zodi tará íbar hélaf repouth goré dé óile, tarár UNHCR dokumén gin baatil gorídibó ar keis sín bongorídibó. Íba yé aró iiyan dibigoré dé ki íba UNHCR ót ham goré dé íiyan ólla íbar késsú noibó.
Enombór ókkol óttu aiyé dé meséig ókkol oré díyan arde juwab nodibá, ar tuáñré foñósa dé meséig gan oré eskrincót loi onlain fórom ót lagai oré UNHCR ót repouth goró.
Iiyan ekkán zál ham yá dúkabázi. E manúiccwá UNHCR ólla ham nogoré. UNHCR or ókkol hédmot maana. Tuní UNHCR or estaf yá zehonó mancóré tuáñr keis or rejistar, RSD, duara bocótigorá yá zehonó moksót or karwaiyílla thiañ dinofaríba.
UNHCR loi háas tallukat asé hói dabigoré dé manúc ókkol óttú húñciar, zará thiañr bodolat tuáñré intarbyu ókkol ólla yá duara bocótígorái bor modot gorífaribó hoó. Tuáñr zaatí maalumat tará ré cíar nogóijjo.
UNHCR ré beéng ekoun nombór ót thiañ fáldai dibólla tuáñré honótté nohoibó. Refúji ókkol óttu thiañ lowat cámil asé dé zehonó UNHCR or estáf ore éhon-éhon ham óttu nelaidi ore fulíc ót repouth gorídibó.
Zodi tuní cubá lagedé hórkot ókkol or baabote UNHCR ót repouth goró dé óile, tuáñr UNHCR or kaád kensél nogoríbó ar tuáñr keis or ham oré deríyó nogoríbó yá bonó nogoríbó.
Zodi honó kiya thiañ loi oré UNHCR or hédmot ókkol (Rejisthrécén,RSD,Duara Bocótígorár, wagáira-wagáira intarbyu ókkol) difaré hói dabigorí tuáñr lói taalukat goréddé óile, fún kool éhon-éhon haçidií eçé repouth goró:
- Fulíc CCID Dukár Juwabdiyar Sentar óilde 03-26101559 yá 03-26101599
- UNHCR or e fórom mwá estemal gorí
UNHCR or karwaiyi ókkol arde modot or aró maalumot faité, meérbanigori “Refugee Malaysia website” ót zai soó.