Tuñár Fua Rejistar-goróon

Tuáñrtú zodi íyarbútor fuwa óiye dé óile, tuñi fuwa íbar foidacir dóftór górí faríbá ar hókumot or decóitta rejistri dipármén (NRD) ziyánore Malaysiat Jabatan Pendaftaran Negara (JPN) hoó íyanor zehonó ékkan mokami ofís ót zai foidacir sónot yá zonom sónot loifaribá. NRD ofís ót honó fís adaigorá noforibó zodi fua óiyoré 60 din or bútor tuñi ham íiyan goró dé óile. Lékin, 60 din or baade óile, leit rejistrilla tuáñrtú fís adaigorít fáre.

Tobka 1: Foidaci Doftór Gorár Fórom lowa

Dorhás or fórom gán fuwa óiye dé hóspitel óttu lói lóiyo, yátoba decóitta rejistri dipármén (NRD) or ékkan mokami ofís óttu lóiyo.

Tobka 2: Decóitta Rejistrir dipármén ót Zai Berai Soó.

Decóitta rejistri depármén (NRD)’r ékkan mokami ofís ót, fura góijje dé fórom gin arde zorurot óibó dé habosfonna gín lói zoó. Tuáñrtú nisor jiníccín laibó:

  • Forisogorár dokumén (UNHCR or kaád ókkol yá Báfasíntagórat asé dé ciñçí(UC letter) / kommiuniti kaád / fasput) – originel arde sábaiya kopí
  • UNHCR ót doftór óiyo dé maa-baaf ókkol ólla, meérbanigori tuáñr UNHCR kaád yá báfasíntagórat asé dé ciñçí “(UC) letter” gín NRD ofís ót diyo. Zodi tuñí kaanuni fasput dóro dé óile, meérbanigori NRD ofís ót fasput ór tofsil ókkol diyo. Fasput or tofsil ókkol rekod rakónor móksút hísafe tuáñr fuwar zonom súrot ót cámil góribó. Tuáñr fasput or tofsil ókkol tuáñr decót cíar nogoríbó. Tuáñr UNHCR or dokumén miyat giyói dé íiyan ólla, zodi tuñí tuáñr fuwálla zonom súrot loi nófáro dé óile, zetúnot UNHCR or dokumén gín nuwagori loifaribá étunót tuáñr lói dáke ásé dé NRD’r branc ofís ót záifaribá.
  • Maa-baf or biár yá sárasarír sárthifikéit( zeçé zorurot)- orijinal yá sábainokol sábaiya
    Meérbanigori kíyalgóriba dé ki NRD ye siríf Malaysia’r dórmor adikar ókkol yá oinno rejistargorár adikari ofisar or torfóttu diyedé ofisor biayr sárthifikéit ókkol oré kaanuni biyar sóbut hísafe mane. NRD ofís ót, koumor ofís óttu diyé dé nekásúrot ókkol nogosé. Zodi tuñí mosúlman óile ar hókumot or nekásúrot nái dé óile, fuwar zonon súrot ót úde maar nam cámil oibó. Gair-muslim baf-maallái, hókumot or nekásúrot noo tákiléyó fuwar zonom súrot ót bafor nam cámil gorázaibó.
  • Daktor hánar habosfonna yató fulic or asóli repout loi fuwar foidacir fákka-fákki óibó, zodi fuwa gorot hálas oíye dé oile.
  • Fura-goijjá foidaci rejistri fórom – asóli ar nokol goijja kopí.
  • Foidacir age cékúp góijjé dé kitab (maa hówar emtahángorár kitab) yá epoáinmén kaád – asóli
  • Zodi tuñára biyá-noóde gair-Musólman juçi oilé, O manuicwa zibá fuar baf boli daabi goré ibattú, foidaci rejistrit fuar Maar fuañti hámaká dostok-diya foribó. Noóilé, foidacor salti-fiket ot bafor maalumat camil noibó.
  • Deri óiye dé foidacir rejistrílla, zorurot óibó dé dokumén or baabote aró maalumat záinte, meérbanigori JPN website ót zai soó. (Úde háwalálla), hotá báñigá AM 80 arde BMK 81 fórom ókkol eçé faá zaibó.

Yiatráikkó : Honó ékkan NRD ofís ót mosólar sámna óiyó dé óile, ( ki óiyé dé, íiyan hoñótté óiye dé ar hón NRD branc cámil) íin biaággínor tofsil ókkol loi, tuáñr koumor lidár ore cíargóri, meérbanigori UNHCR ore hóbor dibá. Zodi farode ói, meérbanigori mutaállék habosfonna ókkol or fotú yá tofsil ókkol cámil góriyó.

Yiatráikkó

v

Molai-zuban hoódé manuic

Zodi faille, uggwá Molai zuban zanedé maincóttu, tuñí modot sai bólla, añára tuáñre mocuwara dito saái.

Koid-hánat foida óon

Zodi uggwá fuwa maa bondihánat tákité óodde óile, ébondihánár immigracén adikari yé fuwar foidacir rejistri arde foidaci sónot faibólla modot gorífáré, kiyólla hóilé maa-fuwa duní zon éi immigracén adikar or héfazot ót áse.

Manúic-zon Rejistri goroón

Maa-baf, kaanuni woli yá zehonó manuic zar foidacir zana asé íbayé, foidacir rejistri gori fáre, zeñété ítara lagedé habosfonna ókkol ané.

Decóitta Rejistrir Depármén (NRD) Asédé Zaga

Eçé liís goragiyé dé zehonó NRD ofís ót tuñí záitfaró. Zodi tuñi Kuala Lumpur ot taako de oilé, añara doftor yáni ofís yiánot zai bólla cúwaríc góijjoum.

NRD/JPN Jalan Duta
Bangunan Kerajaan Jalan Duta
(Kompleks Kerajaan Tuanku Abdul Halim)
Publika Dutamas, 1, Jalan Dutamas, Solaris Dutamas
50480 Kuala Lumpur

Tuñí eçé e-vídiyu gín Molai, Ingilíc, arde óinno zubanotó fúni fáriba taaké Decóitta Rejidtri Depármén (NRD) ofís ót foidacir rejistri gorár torika ré buzí loifaro.

Nuwa óiye dé fuwa tuáñr UNHCR or fáil ót gólon

Zodi tuñi UNHCR ot rejistar gorifelaiyó, ar tuñi foidacir salti-fiket ar/yáto tuáñr ledera fuwar óinno modoti habosfonna okkol faifelaiyó dé óile, meérbanigorí Fémlir Buniyadir Tobdil fórom gán furagorí oré, foidacir sónot ar/yáto zoruri óinno modoti habosfonnar, ékkan kopi aplúdgóro.

Duniai sóraiye dé COVID-19  or zoriya,  UNHCR e epoaínmén sára honó kiay ré nogosé. Meérbanigori epoainme’n sára UNHCR ót noaiccó. Tuñí  ”Family Composition Change” fórom mwá furagorí oré epoainmén ólla dorháas gorifariba ar epoainmén ólla UNHCR or torfóttu dake dé étun fóijjonto entezar goró.