UNHCR re refúji ókkol arde sáara-towouya ókkol zetará UNHCR or dokumén ókkol(kaád yá Báfasínta Gorád Asé dé Ciñçí) áñzáiye tará ré monot gorái ditosaár taaké tará “Refugee Malaysia website” or ei fórom mwá zoriya áñzáiyo dé dokumén ókkol or repouth gorítfaré.
Meérbanigori kíyal rakíbá dé ki áñzáiyódé dokumén ókkol ólla fulíc or repouth ekkán loon nán laazim noói. Zeétté tuñí “Refugee Malaysia website” loi áñzáiyodé dokumén ókkol or repouth ekkán zoma doó, UNHCR ré macór bútor tuáñré taaluk goríbó taaké UNHCR or ofís ót aibólla tuáñré epoáinmén uggwá mokorór goríbó ar tuáñr dokumén or bodolat arekkán gosílóiba. Zodi tuñi tuáñr dokumén nán ekbar óttu becí áñzoó, tuñí siríf dokumén or ekkán sónot or kofí fáiba.
Dokumén áñzáiyodé íiyan or repouth gan “Refugee Malaysia website” loi zoma donor baade, mústokbol rekód ókkol ólla repouth or háwala nombór gwá meérbanigori iyat ráikkó. Meérbanigori websáit or fórom gwá duara zoma nogóijjo kiyólla hóile íiyan karwaiyir ham mán aró becí deri goráibo. Zodi UNHCR or torfóttu zari góijje dé dokumén ókkol or dúkadiyar zehonó sóbut faá giyé dé óile, tuáñré dúkabázi góijjo dé íiyan ólla tahákík gorá záibo.
Zodiyó tuáñrtú dokumén áñzáiyodé íiyan or fulíc or repouth nái, tuñi tuáñr dokumén or bodolat arekkán faiba. Tuáñr nizor rekód ólla zodi fulíc repouth góitto soó dé óile, meérbanigori iiyan fákka goribá dé ki fulíc oré diyódé maalumattín sóiyi. Misá repouth gorá Malaysiar kaanun mutaabek ekkán jrúm, ar zodi cástí déi, manúiccwá ré 6 mac fóijjonto ziyól marítfáre yá Ringgit 2000 fóijjonto zoribana gorítfáre yá duníyat. UNHCR re zehonó hosúrír keis ókkol ólla théngólai nodibó.