Sehétor Hédmot okkól

Foilá-cúrur Hédmot

Foila-cúrur Hédmot óilde ibtedayi, buniyadi séhetor khédmot ókkol. Zodi tuáñrtú ocúk óo, tuáñrtú foila ekkán buniyadi sehédti hédmotdiyar kiliník ót zonsá. Tuáñrtú ocúk becí óofan sai notáikko kiyólla hóile éñtté tuáñrtú hóspitel ót aró becí hóros óibó dé elac or zorurot óitfare. Buniyadi hédmotdiyar kiliník ókkoleyó aámbáfe fuaindór véksin mare, (cómwala mayafuaindólla) hámil or hédmot, hándani flangorár hédmot ókkol, arde miçá biaram ar loubrá biaram or elac gore.

• Hókumot or sehét hána ókkol- Klinik Kesihatan yá hókumot or hóspital ót Outpatient Departments (OPD) yáni Baárór Biaraimmar Dipatmén ókkol.

Hókumot or sehét hána ókkol ót refúji arde sáara-tuwoya ókkol oré buniyadi elacor hédmot ókkol goré, lékin hóros óil dé UNHCR ót rejistar óiye dé mancólla bidecóitta mancór hóros or cóthor 50 bág or fúan. UNHCR or dokumén sára óile bidecóittar hóros or fúan hóros loibo. Zeñétté UNHCR ót rejistar góijja manúic ókkol oré hókumot or sehét hána ókkol ót dabaide, éñtté bidecóitta ókkol oré 5 din ólla dabai dedé éndilla nodi fuúl dabai diféláitfare. Tuñí “MoH circular” iyan dehái fuúl dabai didibólla aros gorítfaro.

• NGO’r kiliník ókkol

Nisor NGO kiliník gin ót refúji arde sáara-tuwoya ókkol oré hom thiañ loi buniyadi elac or hédmot ókkol de. Késsu yé mobáil kiliníkó goré ziyan tuñí tákodé zaga loi hañsé óitfare; meérbanigori tará lói taalukgori zanilodé kí tará tuáñrtú cúida ódé zagat mobáil kiliník goré kí nogoré.

• Praivéit kiliník ókkol

Praivéit kiliník buniyadi sehéti hédmot ólla tuáñrlá boli ókkol óttú hañsór ekkán puáin óitfare, lékin hókumot or yá NGO’r kliník óttu báre becí hóros lóitfare. Kessú praivéit kiliník ziín refúji arde sáara-tuwoya ókkol ólla doiya dehái hom hóros loibólla razi óiye íin ót cámil asé Qualitas Health Group, Care Clinic ar Global Doctors (kiliník or thíkana ókkol zanibólla kilíkgoro ). Ekiliník or becír báge UNHCR or dokumén ókkol yá koum or forisor kaád yá ciñçí ókkol óité loi zehonó foriso dokumén ókkol manilo.

Dusára tobkar elac or hédmot or zorurot óo zeñétte ekzon óttu ekkán mockil elac or mosóla táke ziyan ólla hóspitel ot elac or yá haçasíra gorár zorurot óo. Iyan óitfare zoruri elac ólla, yá ham or zagar yátoba gañrír eksíden or doilla sótma lagonor zoriya, yá buniyadi kiliník ót tuáñré elacgorí nofarí dusára tobkar elac or hédmot ólla háwala diye dé íyan ólla. Zodi tuáñrtú ekkán kothín agát asé yá biaram asé dé óile, tuáñrtú ókkol óttu hañsor hókumot or hóspitel or Eksíden arde Zoruri Depármén ót fóuran elac or tuwájju donsá.

Hókumot or hóspitel ókkol, UNHCR ót rejistargorár refíji arde sáara-tuwoya ókkol óttu rejistargorár hóros 50 ringgit alge. Bútorgwá biaraimma hísafe hóspitel ót uçí tákafore dé refúji arde sáara-tuwoya ókkol óttu, aksór adipojíth 700 ótti 1,400 ringgit diafore. Tuáñr hálat hoddúr kothín de íyan uore darmudargorí, hóspitel ót ze hóros san loibo íyan tuáñr dipojít óttu becí óitfare. UNHCR ót rejistargorá refúji arde sáara-tuwoya ókkol óttu bidecóittar hóros or cóthora 50 bág loibo, lékin UNHCR or dokumén sára manúic ókkol óttu bidecóitta ókkol or fura hóros loibo.

Hotlain ibá thík sehéti hédmot doiya ókkol/NGO paáthnar ókkol/refúji arde sáará-tuwoya ókkolor ólla taaké siríf elac or modot ólla inquari gorí aros gorítfare. Hotlain ibát rejistargorái bólla arde duara-bocótí gorái bólla meérbanigori taaluk nogóijjo.

Fáan címa báinda asé dé íyan ólla, siríf olfo aros oré monzur goríbo. Monzurir fáisela gan “Health Referral Committee” yáni Sehéti Háwaladiyar Komíthí yé goríbo ziba ré UNHCR arde 3 nwá NGO óttu loiye dé elacor yá gair elacor nomainda ókkol loi banagiye.

Nuth: MRA ye kidni féil óiye dé íyan ót dialaisis or zorurot óde zehonó keis ót modotgorí nofare. Amgurudár sajari ókkol, angioplasti yáni amgurudár louwórnalir bon noófan plastargorá, arde kensar or elac ólla yó fáan ókkol foon or uore darmudar.