UNHCR luh asiloah min khumhning

Ralzam le Dornak A Sawkmi Hna Caah Thawngthanhnak. Malaysia ah dornak sawkning le ralzam sinak caah min khumhning

Malaysia ah dornak sawkmi tawlrel ningcang

Miphun kong, biaknak kong, rami sinak kong, ramkhel pomning kong ah siseh, zatlang bu pakhat i chungtel sinak ruangah siseh; ral, hremnak asiloah minung sinak man ngei loin tuahto le hrem na ton ruangah na nunnak ca tiangah fak tukin harnak a tong ding na si ruangah na chuakkehnak ram a zamtakmi na si ahcun dornak na sawk khawh.

Dornak kawlnak caah tuah dingmi a dot khatnak cu cazin ah min khumh a si. UNHCR ah dornak a sawkmi hna an konglam le an sining kha philh ti lo dingin ttial, an konglam an chimmi a dik/ dik lo tiah zoh tthan le a hnubik an konglam le an sining hna thar chuah i zoh tthan lengmang kha min khumh timi cu a si.

Cazin i min khumhnak ding caah UNHCR Malaysia sinah zung kal ding ni caan hna hal a herh. Mahhi website chungah a ummi Contact Form tinak zawn ahhin online in pumpak nih zung kal ding ni thla hal khawh a si.

Na halmi voikhat na kuat cang hnu cun zung kal dingmi ni caan UNHCR nih an in chawnh dingmi kha rak hngak. Halnak kuatmi paoh cu tawlrelpiak dih a si ko lai, nain a hal vemi an tamtuk caah halnak na kuat cangka in UNHCR nih lehnak an in tuah kho colh lai lo. Zung kal ding ni caan halnak voi khat na kuat cang hnu cun a thar in a dang na kua tthan ti lai lo.

UNHCR Malaysia he i ton dingmi ni caan

UNHCR Malaysia nih amah he i ton dingmi ni caan na halmi kong he pehtlai in voi khat thawng an in thanh cang hnu cun nan i ton dingmi caah khan timhtuahnak na ngei kho cang.

Dornak a sawkmi paoh nih (na chungkhar asiloah nan i cawmkenmi/nan chungkhar sinah a um vemi hna telh in) cazin ah min khumh dingmi ni caan ah nan dihlak in nan um a herh.

Cazin chung min khumh tikah na konglam le na sining kha a dikning, zumhtlak tein le tlamtling tein na chim dingmi kha a biapi. Tlamtling lo asiloah a dik lo ningin na konglam le na sining na chim ahcun na case ah harnak na tong kho.

Malaysia ah na chungkhar nangmah sinah an um ah siseh, vawleicung hmundang i an um zongah siseh an dihlak in an konglam kha felfai te le tlamtling tein na chim dih hrimhrim hna lai. Chungkhar timi ahhin phungning tein asiloah mah nunphung zulh tawnmi phunglam ningin i cawmmi hna zong an i tel chih. Chungkhar ahhin hringtu nulepa (thisa in hringtu asiloah cawmkengtu nulepa), unau (nu khat pa khat, nu dang pa khat asiloah pa khat nu dang, i cawmkenmi unau), fale (nangmah thisa in na ngeihmi, i cawmkenmi, fa-ei, na nupi tthing asiloah na vapa tthing he nan ngeihmi fale, midang sin ah na rak ngeihmi) kha an i tel dih.

Cazin ah khumhmi minung pakhat cio nih file number an ngeih lai. Hmailei ah Zung he thawng i thanh le i pehtlaih tik paoh ah file number hi langhter peng a herh lai.

UNHCR ah voi khat min khumh na si cang hnu cun zeitik tiangdah hman khawh a si tiah ni thla aa ttial chihmi UNHCR card asiloah a dang catlap pek na si lai. Na UNHCR card asiloah na catlap ni thla a thih tik asiloah a thih deng cang ah siseh a thar la tthan dingin Zung ah na ra lai.

UNHCR card hi zeidah a si i zeibantuk sinak le dirhmun dah a pek?

UNHCR riantuannak tangah pumpak in huhphenhnak le kilvennak pek a herhmi hna cu UNHCR card asiloah aa tlakmi a dang catlap pek an si. Card aa tlaihmi asiloah catlap aa tlaihmi hna cu UNHCR huhphenhnak le kilvennak tangah a ummi a si ti kha a langhter.

UNHCR sinnak a langhtertu ca nih ttih a nungmi tlaihkhihnak chungin zeimawzat an khamh khawh, cun UNHCR le a riantuan tti bu hna asiloah midang sin in ngandamnak lei ah siseh, fimcawnnak le a dang a herhmi bawmhnak hmuhnak ding caah lam an pek khawh.

UNHCR card hi sinak a langhtertu ca lawng a si i, nangmah cu UNHCR huhphenhnak le kilvennak tangah a ummi na si kha a langhtertu a si. Malaysia ah cun phungning tein hman awk a tthami le cohlanmi a si lo i, ramdang kal khawhnak cauk (passport) zong a si lo.

Zeidah ken a herhmi an si?

Passports, nangmah na sinak/ sining a langhtertu catlap hna, thitumhnak ca, nauchuak ca, chungkhar min cazin ttialnak ca (ing-tthawng-suh cazin) asiloah na hmatpungtin, ralkap na rak ttuannak cauk hmete, siizung na kalnak ca hna, cun hmundang ah a ummi UNHCR zung ah siseh, UNRWA zung asiloah ramdang cozah sinah min khumh na rak si bal ahcun mah cu ca vialte hna telh in na case he aa pehtlaimi le a herhmi ca paoh naa ken dih lai.

UNHCR nih an in pekmi ca paoh biana ah nangmah na sinak a langhtertu card (identity card), “a sining ruahpiak lio a si” tiah pekmi ca, zung rat dingmi ni le caan pekmi card le, zung ra dingin catialpiakmi cathlap ah ni le caan aa ttial chihmi tibantuk paoh na rak i ken dih lai. Malaysia si loin hmundang UNHCR Zung in an in pekmi zeibantuk ca paoh na rak ken dih lai.

Zeibantuk huhphenhnak le kilvennak thengte dah a herh i zeibantuk thinphannak thengte dah a ngeih timi kongah case cheukhat Ralzam Sinak Ding Biachahnak (RSD) caah hal a si lai. RSD biahalnak a dihlakin phit a herhmi na si ahcun UNHCR nih tha tein theihternak an in pek tthan te lai.

Chungkhar ah kumtling cangmi hna cu a dang tein biahalnak tuah an si lai. UNHCR na sawkmi he pehtlai in nangmah kongah ca le tette piah ding na ngeih ahcun tha tein na pek chih hna lai i, nan chungkhar na rat pimi an um ahcun tha tein thawng na thanh lai.

Nangmah na chim thiammi holh tein biahalnak tuah ka duh tiah chimnak nawl na ngei. Biahalnak tuah na si lioah holh an lehpiaktu nih an chawnhmi/ a chimmi nai fian lo/ theih lo ahcun UNHCR Officer kha na chimh hrimhrim lai.

UNHCR phungphai le thiltuahmi ningcang tangah a tlingmi phungning aiawhtu zong nih an in bawmh khawh. Dornak Kawlnak timi hi bu pakhat a si i ralzam le dornak kawlmi hna nih an himlonak/ an zamnak kong an chimmi kongah man lo tein phungning mi bawmtu an si. Bawmhnak halnak ding caah malaysia@asylumaccess.org ahhin na ram ah na kir khawh ti lonak le zeicahdah phungning in bawmh na herhnak kong kha nangmah holh tein email kuat khawh a si.

Ralzam ah cohlan ka sinak ding caah biachahnak hi zei can dah a rauh lai?

Case pakhat cio hi a dang cio tein le pakhat hnu pakhat in zoh an herh caah na case kongah zei can dah a rauh lai timi cu na case sining cungah ai hngat. Zung nih sohhlua tamtuk a tawlrel hna caah zung ah na rat ding ni caan tuahpiakmi kongah siseh, cun na sawkmi a phi na hmuhnak ding caah siseh thla tampi a rau kho. Na kan ruahthiamnak le na lungsaunak cungah kan i lawm.

A voi khat biachahnak ah ralzam ah cohlan si hlah ninglaw zeitin?

RSD biahalnak na dih hnu ah ralzam ah cohlan na si lo tiah theihter na si ahcun ni 30 chungah nawlnak ca na van ttial than khawh. Nawlnak ca na ttialmi cu zung i na pek hnu ah a hramthok i biahalnak a rak in tuahtu si ti loin UNHCR Officer a dang nih nawlnak ca na tttialmi cu a zoh than lai.

Nawlnak ca na ttialmi zohpiak na si hnu ah cohlan than na si ahcun ralzam ah cohlan na si lai. Nain, nawlnak ca na ttialmi cohlan lo a si ahcun na file kha phihpiak na si lai.

Atu le Atu Hal Lengmangmi Biahalnak Hna

Dornak a sawkmi timi cu zeibantukdah a si?

Minung pakhat Malaysia ramchung i a luh hmasa cemnak hmun in siseh, asiloah Malaysia a luh hnu zongah siseh a chuahkehnak ram ah a kir ngam ti lonak a langhtertu le a chimphuangtu kha dornak a sawkmi timi cu a si. Dornak a sawkmi paoh nih cun UNHCR nih phungning tein dornak a sawkmi a si tiah cazin khumh nakding caah dornak sawknak sohhlua kha a phit dih hrimhrim lai.

Dornak a sawkmi a si tiah min khumh hnu ah ahodah ralzam ah a tling timi kha ralzam sinak ding caah biachahnak tuah ningcang tein tuah an si lai. Ram upadi sermi ah ralzam sinak ding caah phungphai a um lo, cucaah 1951 Convention i Ralzam sinak kong he pehtlai in ralzam sinak sullam fianternak ningin ahodah ralzam ah a tling timi kha UNHCR nih biachahnak a tuah lai.

Dornak a sawkmi hna cu an chuahkehnak ram ah an kir ngam ti lonak an chimphuan le an langhter thok in UNHCR nih ralzam cohlan ding/ ding lo a donghnak bik biachahnak a tuahpiak hlan chung paoh cu hramhram in kirter an si nakhnga lo huhphenh le kilven an si.

Miphun pakhat na sinak, na biaknak, rammi na sinak, ramkhel kongah na pomning asiloah zatlang bu pakhat ah chungtel na si ruangah na chuahkehnak ram asiloah tuandeuh ah na rak umnak ram ah na kir ahcun na nunnak caah ttihnung tukmi thil le harnak na ton ding a si i na kir ngam ti lo na si ahcun Malaysia ah dornak na sawk khawh.

Ralzam timi cu zeidah a si?

Ral thawh ruangah siseh, buainak ruang asiloah, miphun, biaknak, rammi sinak, ramkhel pomning le zatlang bu pakhat i chungtel si ruangah hremnak a tuar dingmi si ruangah a chuahkehnak ram a zamtaktu kha ralzam timi cu a si. Ralzam nih cun hremnak tuar/ton dingmi ttihphannak ttha tein a ngei i, mahcu a ttihphannak ruangah cun a inn ah a kir kho lo, asiloah kir kha a ttih. Zeicatiah, a kir ahcun huhphenh le kilven khawh a si lai lo.

Dornak a sawkmi a si tiah min khumh hnu ah ahodah ralzam ah a tling timi kha ralzam sinak ding caah biachahnak tuah ningcang tein tuah an si lai. Ram upadi sermi ah ralzam sinak ding caah phungphai a um lo, cucaah1951 Convention i Ralzam sinak kong he pehtlai in ralzam sinak sullam fianternak ninginahodah ralzam ah a tling timi kha UNHCR nih biachahnak a tuah lai.

Ralzam hna cu an chuahkehnak ram ah hramhram in kirter an si lo nakding caah huhphenh le kilven an si.