UNHCR luh asiloah min khumhning

Dornak kawlnak caah tuah dingmi a dot khatnak cu cazin ah min khumh a si. UNHCR ah dornak a sawkmi hna an konglam le an sining kha philh ti lo dingin ttial, an konglam an chimmi a dik/ dik lo tiah zoh tthan le a hnubik an konglam le an sining hna thar chuah i zoh tthan lengmang kha min khumh timi cu a si.

Min cazin khumh ding in sawknak caah Refugee Malaysia website ah a ummi Mithar Zungluhnak (New Registration) zawn ah khan online hmang in na sawk lai.

Voi khat na kuat cang hnu cun zung kal dingmi nicaan UNHCR nih an in chawnh dingmi kha rak hngak. Halnak kuatmi paoh cu tawlrelpiak dih a si ko lai, nain a hal vemi an tamtuk caah halnak na kuat cangka in UNHCR nih lehnak an in tuah kho colh lai lo. Zung kal ding ni caan halnak voi khat na kuat cang hnu cun a thar in a dang na kua tthan ti lai lo.

UNHCR he i ton dingmi nicaan

UNHCR Malaysia nih amah he i ton dingmi nicaan na halmi kong he pehtlai in voi khat thawng an in thanh cang hnu cun nan i ton dingmi caah khan timhtuahnak na ngei kho cang. Dornak a sawkmi paoh nih (na chungkhar asiloah nan i cawmkenmi/nan chungkhar sinah a um vemi hna telh in) cazin ah min khumh dingmi ni caan ah nan dihlak in nan um a herh. Cazin chung min khumh tikah na konglam le na sining kha a dikning, zumhtlak tein le tlamtling tein na chim dingmi kha a biapi. Tlamtling lo asiloah a dik lo ningin na konglam le na sining na chim ahcun na case ah harnak na tong kho.

Malaysia ah na chungkhar nangmah sinah an um ah siseh, vawleicung hmundang i an um zongah siseh an dihlak in an konglam kha felfai te le tlamtling tein na chim dih hrimhrim hna lai. Chungkhar timi ahhin phungning tein asiloah mah nunphung zulh tawnmi phunglam ningin i cawmmi hna zong an i tel chih. Chungkhar ahhin hringtu nulepa (thisa in hringtu asiloah cawmkengtu nulepa), unau (nu khat pa khat, nu dang pa khat asiloah pa khat nu dang, i cawmkenmi unau), fale (atu na nupi asiloah na va he nan ngeihmi, i cawmkenmi, fa-ei, na nupi tthing asiloah na vapa tthing he nan ngeihmi fale, midang sin ah na rak ngeihmi) kha an i tel dih. Cazin ah khumhmi minung pakhat cio nih file number an ngeih lai. Hmailei ah Zung he thawng i thanh le i pehtlaih tik paoh ah file number hi langhter peng a herh lai.

Voi khat min khumh na si cang hnu cun UNHCR card asiloah zeitik tiangdah hman khawh a si tiah nithla aa ttial chihmi Asining Ruahpiak Lio A Si (UC) timi catlap pek na si lai. Na UNHCR card asiloah na catlap (UC) nithla a thih ni ah a thar la tthan dingin UNHCR zung ah na ra lai.

COVID-19 ruangah zung rat nicaan pek hmasa na si lo ahcun zung ah rak ra hlah. Na card asiloah na catlap a thar la than dingin UNHCR nih an in chawnh dingmi lungsau tein rak hngak

A Herhmi Ca Hna

Passports, nangmah na sinak/ sining a langhtertu catlap hna, thitumhnak ca, nauchuak ca, chungkhar min cazin ttialnak ca (ing-tthawng-suh cazin) asiloah na hmatpungtin, ralkap na rak ttuannak cauk hmete, siizung na kalnak ca hna, cun hmundang ah a ummi UNHCR zung ah siseh, UNRWA zung asiloah ramdang cozah sinah min khumh na rak si bal ahcun mah cu ca vialte hna telh in na case he aa pehtlaimi le a herhmi ca paoh naa ken dih lai.

UNHCR nih an in pekmi ca paoh biana ah nangmah na sinak a langhtertu card (identity card), a sining ruahpiak lio a si tiah pekmi (UC) ca, zung rat dingmi ni le caan pekmi card le, zung ra dingin tialpiakmi ca paoh zung na rat ni ah na rak i ken dih lai. Malaysia si loin hmundang UNHCR Zung in an in pekmi zeibantuk ca paoh na rak ken dih lai.

Na fa benh ning

Fa ngei kami na si ahcun na fapa asiloah na fanu te kha cozah zung a simi National Registration Department (NRD) ah min cazin na va khumh lai i, nau chuak cazin na lakpiak lai. Na fa a chuah in ni 60 chungah na tuahpiak a si ahcun a tuah man NRD ah phaisa pek a hau lo. Asinain, ni 60 hnu ah na tuah a si ahcun tlai man ah phaisa liamter khawh na si.

UNHCR Ca

UNHCR riantuannak tangah pumpak in huhphenhnak le kilvennak pek a herhmi hna cu UNHCR card asiloah catlap pek an si lai i mahhi card asiloah catlap aa tlaihmi hi UNHCR huhphenhnak le kilvennak tangah a ummi a si ti kha a langhter.

UNHCR sinnak a langhtertu ca nih ttih a nungmi tlaihkhihnak chungin zeimawzat an khamh khawh, cun UNHCR le a riantuan tti bu hna asiloah midang sin in ngandamnak lei ah siseh, fimcawnnak le a dang a herhmi bawmhnak hmuhnak ding caah lam an pek khawh.

UNHCR card hi sinak a langhtertu ca lawng a si i, nangmah cu UNHCR huhphenhnak le kilvennak tangah a ummi na si kha a langhtertu a si. Malaysia ah phungning tein hman awk a tthami le cohlanmi a si lo i, passport zong a si lo.