UNHCR loi doftór óon

Malaysiar UNHCR loi rejistar gorár torika

Rejistar or aros goríbólla, meérbanigori “Refugee Malaysia website” ót faázadé “New Registration” fórom gwá zoma doó. Tamám dorháas yá aros ókkol or karwaiyi gorá záibó, lékin zoma diya becí óiye dé íiyan ólla, UNHCR re fóuran juwab dinofaríbo. Meérbanigori UNHCR re rejistargorár epoáinmén uggwá deéfán entezar goró. Rejistar goríbólla becí manúic entezar ót asé, étólla entezar gorár muddot lamb ói.

Zodi wébsáit or zoriya ekkán rejístargorár aros zoma góijje de óile, rejistar ólla aros ókkol baarbar zoma nodiyó Éndila goró dé óile, tuáñrlá arde óinno zon ólla karwaiyi góitté deri óibo. Zodi tuñí wébsáit or zoriya rejistar goríbólla dorhás gori tákile, meérbanigori háwa nombór gwá sábai lóibólla yá nize rikíbólla monot ráikkó.

Nuwa doftór goribólla bóli “UNHCR Reception Centre” yáni ofís ót noáiccó zodi tuáñrtú honó epoaínmén nái dé óile. Tuáñr epoaínmén zeétté mokorór goríbó éetté tuñí epoáinmén uggwár fún kóol fáiba ar íiyar baade tuáñr epoáinmén or tarik arde taim loi ekkán fákka-fákkir SMS fáiba.

UNHCR ót epuáinmén

Malaysiar UNHCR re tuáñré epoáinmén uggwár tarik di ore taaluk góijje dé óile, tuñí tuáñr epoáinmén ólla toyari lóifaribá. UNHCR re tuáñr rejistar goríbó dé epoáinmén ót tuáñr fúáñtí hon-hon aái faríbó dé íiyan tuáñré zanai dibó. Zehonó oinno manúic, eén kí fémilír membór ókkol ó UNHCR ót Gosíbar Sentar ót gólibor ejazot nofaibó.

Rejistar goribar taim ót tuáñrtu sóiyi, háñsa ar furafuri maalumat doón nán zoruri. Adáadi yáto golot maalumat tuñár keis ólla nuksani óítfáre. Tuáñrtú tuáñr hándani membór ókkol or furáfuri tofsil diya foribó, ítara tuáñr fúáñti Malaysia’t tákóuk yá duniyáir arhonó zagat. Eçé bútor bou/zamai, bab-maa(zonom diyé dé yá/ar fáillé dé), bái arde bóun ókkol(cúddor, adá, átái,falok), ar fuain ókkol( cúddor, falok, átái fuain arde agor giríssir yá najayes taaluk or fuain) ókkolo cámil..

Zorurot Óodé Hafosfonna Ókkol

Meérbanigorí tuáñr keis loi taaluk asé de ókkol dokumén aníyo, zeçe paásputh ókkol, foriso habofonna ókkol, biyar sarthifikéit, zonom sarthifikéit, fémilír sensar yá decór foriso dokumén, melethrít sárvis góijjo de gurabuúk ókkol, elac or sarthifikéit ókkol, oinno UNHCR or ofís ót, UNRWA’r ofís ót yá hókumot or ofís ót age rejistar óiyo de sóbut ókkol cámil.

UNHCR rér diya zehonó habosbonna zendilla néki, forisor kaád, báfasintat asé dé ciñçí yáni (UC letter), epoainmén kaád, ar tuñár epoainmén or tarík or háwalar ciñçi ókkol meérbanigorí ainnnó. Malaysia baade arekkán UNHCR or ofís óttu faiyó de zehonó dokumén ó házir goróonsa.

Dokumén Nuwagorá

Zodi tuñí UNHCR ót rejistar óigiyogói ar UNHCR dokumén ekkán diyé dé óile, UNHCR or dokumén nán miyat zoónor age tuáñrtú nuwagorón nán zoruri. Miyat fúari zónor dui háfta age, tuñí tuáñr epoainmén or tarík arde taim loi ekkán SMS faiba. Tuñi epoainmén or tarík or tin din age aró ekkan iyatgarir SMS faiba. Dibo de epoainmén or tarik kwá tuáñr dokumén or miyat fúráibór tarík lói hámicá ekdoilla óibo.

Zodi tuáñr UNHCR or dokumén nan miyat fúráigiyó ar tuñí SMS ekkán nóofó dé óile, íiyan or maani eéndé kí UNHCR ót rekód asé dé tuáñr fún nombór gwá ar sóiyi nái. Tuñí tuáñr fún nombór/ email/ tákar tíkana gán zehonó tiam ót fáldaifélo dé óile, “Refugee Malaysia website” estemal gorí “Phone Number Update” yá “Personal Information Update” fórom gán lói apdéit góro.

Tuár UNHCR or dokumén nua bodaloitu aibá de epuaínmén ór din, miyat giyói de dokumén ókkol loi accé de epuáinmén faiya manúiccún oré UNHCR ót Estekbalgorár Sentar ót gólar ejazot diya zaibo. Meérbanigori tuáñr fúañti rejistar nóo dé egena ókkol yá fémilír membór ókkol noainnó; tará re Séntar ót gólar ejazot nodibó.

Tuñár Fua Rejistar-goróon

Zodi tuáñrtú ehón uggwá fua óiye de óile, tuñí fua íbare hókumot or Decóitta Rejistargorár Dipármén yá NRD’r fís ót rejistargorí ekkán zonom sarthifikéit loitfariba. NRD ofís ót honó fís adaigorá noforibó zodi fua óiyoré 60 din or bútor tuñi ham íiyan goró dé óile. Lékin, 60 din or baade óile, leit rejistrilla tuáñrtú fís adaigorít fáre. UNHCR e refúji arde sáara-tuoya ókkol oré nua óiye dé fuan dór zonom sarthifikéit Decóitta Rejistargorár Depármén óttu loi loibólla mosbut or sáñte cúaricgorír. lékin UNHCR ót uggwá fua rejistargoró bólla yian ekkán zoruri tobka noói.

Zodi tuñí UNHCR ót rejistargóijja asó ar tuáñr fua ré tuáñr UNHCR or fáil ót gólaito soó, meérbanigori “Refugeee Malaysia” wébsáit ót Family Composition Change or fórom yáni Fémilír Buniyadir Tobdil oré furagoro.

Áñzáiyodé UNHCR or Dokumén Ókkol

Zodi tuñi tuáñr UNHCR or kaád gán yá Báfasínta Górat Asédé Ciñçí yáni “(UC) letter” gán áñzáiyodé óile, meérbanigori “Refugee Malaysia” websait óttu”Report on Loss of Document” fórom mán loi zoma doó. Zodi tuñi websáit or zoriya áñzáiyodé dokumén or baabote repout zoma diyó dé óile, meérbanigori háwalar nombór gwá sábai lóiyo ré rakóo. Tuáñré UNHCR or torfóttu ek macór bútor taaluk goríbo ar UNHCR ofís aibólla epoainmén tarik uggwá diyó ré uwánor bodolat dokumén ekkán dibo.

UNHCR or Habosfonna

UNHCR ót rejistar óo de manúic ókkol oré UNHCR or dokumén diya zaibo ziyáne hoibó de ki edokumén dóroiya gwá UNHCR or héfazot ót yá taaluk ót asé.

UNHCR or forisoi diyar dokumén nán Malaysia’t honó rosómi kaanuni kimot nái ar iyan ekkán paaspút noi. Iiyané graftari hótara homait fare ar UNHCR, íbar patnar tonzim ókkl arde óinno modotgar ókkol or torfóttu címar butor késsu sehéti hédmot ókkol, elom arde óinno zoruri modoti hédmot ókkol foónor ejazot asé.