KOVÍD-19 ór Paabontir Tole UNHCR or Bidec zaitókiyot oibár Karuwai

Monday / 20 September 2021

Kovíd-19 sóroon óre bongoribár kaanun ókkol ór zoriya, sofór ór paabondi ókkol uddwá, bidec zaitókiyot óibar karuwai ar decór baáre neela ókkol óre duniai agagura, Malaysia’t uddwá hóraf asór gorágiyé.

  • Malaysiar Hókumot ór aám manúic ór sehét ollá diyedé mocuwara ar Lorasora Bongoribár Hókum ókkol ór juab ot, UNHCR or beec híssá khédmot ókkol, bidec zaitókiyot oibár maamela uddwá, duróttu táai (telifún yáto vidiyu koól ór zoriya) gorí zaar, taáke refúji ar UNHCR or manúic ókkol ór sehét óo héfazot goríbellá.
  • KOVÍD-19 ór zoriya alomi sófor ót becí nuksan óiye, Malaysia’t gosí luwa giyedé refúji ókkol ór rowana (yáni félait) óre uddwá asór goijjé.
  • E tobdili (yáni bodola) ókkol é durottú táair intarbyu ókkol gorá ré ainné, mogor bidec zaitókiyot ói faribár corót ókkol ar karuwai ókkol ódoo-odé eddhoilla asé.
    1. Bidec zaitókiyot óon oildé ekkán hóq noó. UNHCR or torfottú rejisthar ar/yáto refújir tobka ré bokhcíc goróon nán ór maání, manúiccwá ré bidec zaitókiyot óibellá háwala goribou dé héen noó.
    2. Bidec zaitókiyot óon nán becí hótarat aséde refúji ókkol ollá ekkán héfazoti azbab hísafe asé. Bidec zaitókiyot óibar keis ókkol ór sinno gorá ré manúic ór héfazoti zorurot ókkol ór uore darmodar gorí jari tákibou.
    3. Bidec zaitókiyot óibar kobul ollá uggwá keis zomadoon nán boóut becí wajá ókkol ór uore darmodar raké, maúic ór héfazoti zorurot ókkol ór dorhar hoddúur asé, héfazoti mahúl, gosíbou dé decór háalot, ar bidec zaitókiyot óibar zaga ókkol asé né híin uddwá.
  • Zodi tuáñr keis oré cúruttú lotí bidec zaitókiyot óibellá sinno goijjé dé óile, Durable Solutions Unit (DSU) ye tuáñre uggwá bidec zaitókiyot óibar karuwaiyir laayekir zañsai gorá ré fura goribellá, aró battí hóborbattiri lagilé telifún ór zoriya zukazuk gorít fare.

Bidec zaitókiyot óibar Intarbyu

Zodi tuáñr keis oré bidec zaitókiyot óibar karuwaillá laayek óiyedé yían tuai faa gilé, tuáñre uggwá górottu táai intarbyu goribellá dawot diya zaibou. Kaanun mouzin, intarbyu beggún intharnét yáto telifún ór zoriya óo, kessú becí kháas maamela ókkol ziín UNHCR or Ofísot aái intarbyu dibar zorurot óde híin baade, KOVÍD é ejazot dilé. E koól goredé woktót, tuúñi Durable Solutions Unit óre, zanai di faribá zodi tuúñi uggwá górot táai intarbyu dibellá no soó dé óile. Yián é tuáñr keis ór bidec zaitókiyot óibar karuwaillá UNHCR or fáiselar notiza ré asór nogoribóu. Mogor, yián é deri gorít fare, kiyólla bouli hoilé, mua-muikká intarbyu ókkol óre siríf UNHCR or ofís ar-ekbar kúliboude héeñtté gorá zaibou de.

Górot táai resettlement intarbyu goréde woktót, UNHCR or ofísar é tuáñre koól bidec zaitókiyot óibar karuwaiyir khúlasa ar koól ór moksót ór uore baçí gorí buzaibóu. Aro, híba yé/híte tuúñi ekkán héfazot zaga zeçé tuáñr bútorgwa hotá ar gufoniyota ré soóñlí raká giyé né yían ór fakka gorí loibou. Zodi héçe tuáñrttú UNHCR or hañsé habosfonna zoma dibar ekkán zorurot ódde óile, tuáñre rasta dahái diya zaibou.

Meérbanigorí, tuáñr bidec zaitókiyot óibar intarbyur abas yáto vidiyu ré rekódh nogoijjó. Yián ekkán gufoniyotar khélaf oibóu ar yián óre UNHCR or torfottú becí sóngin góri saá zaibou.

UNHCR loi Bidec zaitókiyot óibar Intarbyu baade

Bidec zaitókiyot óibar Intarbyu baade, tuáñr keis ór húñciar góri dubara saá zaibou, ar fáil ibá ré ekkán refúji goséde decót tarár fáiselallá, diya zaibou ne nozaibóu yían ór ekkán fáisela luwa zaibou.

Zodi tuúñi UNHCR loi bidec zaitókiyot óibar intarbyu ré di féillo dé óile, ar súal tákile yáto hóbor battiri zanai tóu mone hoilé, mesál, háalot ókkol/fémelír manúiczon bodolilé, meérbanigorí, mlsludsu@unhcr.org hañsé ekkán iméil foóñ sái doo.

Zodi tuáñr keis óre bidec zaitókiyot óibellá zomadiya giyéde óile, Durable Solutions Unit é yáto fáil zomadiya giyéd decé tuáñre tuáñr bidec zaibar keis or uore maalumat dibellá zukazuk goribóu.

Akherkhár, bidec zai tókiyot óibar ejazot dibou ne nodibóu yían óre gosíbou dé dec ókkol é, tarár folosí ar kaanun ókkol ór mutaabek fáisela goré.

Zodi tuáñre tuáñr bidec zaitókiyot óibar intarbyur 6 mác baade, zukazuk gorá nóo zade óile, meérbanigorí, mlsludsu@unhcr.org ‘r hañsé ekkán iméil foóñsó. Becí iméil ókkol gosí foon or zoriy, UNHCR re zon foti beggún ór súal ókkol ór juab dinofaré. Meébanigorí, UNHCR or hañsé, ekhí súal óre boóut mottá no difeçái yó. Yián é karuwai ré aró deri goribóu.

Zodi tuáñr Keis (yáni Fáil) óre Ameriká yáto Kenadar hañsé zoma diya giyéde óile

Zodi tuáñr keis óre Amerikár hañsé zoma diya giyéde óile, tuúñi tuáñr keis or tobka ré Resettlement Support Center (RSC)’r (KL.Inquiries@rescue.org) iméil, telí fún (+603 2141 5846), féks (+603 2144 8716) yáto tarár wébsáith, CASI ’r zoriya cek gorí faribá.

Zodi tuáñr keis oré Kenadar hañsé zoma diya giyéde óile, tuúñi tuáñr keis or tobka ré Kenadar Immigration, Refugees and Citizenship wébsáith ór fórom estemal gorí, cek gorí faribá.

Rowana óibar-Age Entezam ókkol ar ekkán Zaitókiyot óibar Decót Sófor goróon

Wabar zoriya, becí dec ókkol é, sófor goróon ót pabondi lagat as’é, bidecéitta ókkol ór góloon óre homai fari bellá. Aró, dec ókkol é KOVÍD-19 ór wabar hótara ré soóñlí zaibellá decót gólibellá agottú battí daktori cek or karuwai ókkol thík góri raikké. Zeéñtté kessú túra gosí luwa giyéde refúji ókkol é zai tókiyot óibou de decór uzu sófor gorí faijjíil, ehón héçe duniai beggwá rowana goitté deri óor. Refúji goséde dec ókkol é refúji loibellá wada di raikké ar yián acá gorá zadde ki alomi sófor óre aste-aste waba homi lé aste-aste wapes cúru goribóu.

International Organization for Migration (IOM) e rowanar-age zoruri entezam ókkol óre goré, gosí luwa giyéde refúji ókkol ollá zai tókiyot óibou dé decór uzu sófor ókkol ór, rosóm cíkibár kelás ar daktori cek or uddwá entezam goré. Zodi tuáñre ekkán refúji goséde decór torfottú gosí luwa giyéde óile, IOM e tuáñre sófor ór icára redí óile zukazuk gorí aibóu. Zodi tuáñre bidec zai tókiyot óibellá gosí luwa giyéde óile, ar tuáñrttú rowanar-age yáto sófor ór entezamor baabote ekkán súal tákedde óile, tuúñi Kuala Lumpur or IOM oré iomkulinq@iom.int yáto +603 923 5540 nombór ót zukazuk gorí faribá.


Meérbanigorí, zodi tuáñr Fún Nombór yáto Thíkana bodolilé, UNHCR oré zanai diyo.

Zeéñtté tuúñi tuáñr fún nombór yáto thíkana bodolibá, UNHCR oré zanai té foórai nofélaiyó. Yián é UNHCR oré tuáñr hañsé lagede woktót foóñsibellá ar aró deri noóiyoré háwala goijjé dé keis ókkol óre karuwai goribellá ejazot dibou.

DORHARI: UNHCR ór khédmot beggún maana-motthó, féri.

UNHCR yáto íbar sáañti ókkol é dede modot ar khédmot ókkol, bidec zaitókiyot ói faribellá uddwá, tuáñre honó manúic yáto tonzíim é thiñya foicá dibellá magedde óile, biccáic nozaiyó. UNHCR or khédmot ókkol ór bodhoilla, zodi tuáñre thiñya-foicá yáto oinno honó laf ókkol, khúwaic ór dhoillá uddwá magedde óile, meérbanigorí, UNHCR or hañsé yían toratori zanai doo.

Kuala Lumpur or UNHCR: mlslufrd@unhcr.org
(IGO) Inspector General ór Ofís: inspecgtor@unhcr.org
Yáto tuáñr nalic/bisar oré UNHCR or Gate B’r RED MAILBOX yáni LAL BAKCÚ’t dálidoo.
Repouth/nalic beggún óre surha raká zaibóu. Ekkán intharnéth ottú (fókkorai ar dhúkabazír) nalic zoma dibellá, tuúñi aró iñyót ó siban mari faribá.



Share