June 2022 thok in Mithar Laknak Ningcang kongah atu le atu hal lengmangmi biahalnak hna

Friday / 03 June 2022

1 June 2022 thok in card/catlap a thi cangmi nunter thannak le mithar laknak kongah tawlrel ningcang hna cu UNHCR nih update a tuah cang. Mahhi tawlrel ning le kalpi ningcang hna kong he pehtlai in atu le atu hal lengmangmi biahalnak lehnak hna cu hika ahhin zoh hna.

Biahalnak. Ka UNHCR card/catlap a thi cang asilaoh a thi zau ding a si. Zeitindah ka thlen (renew) lai?

Na UNHCR card/catlap a thih hlanzarh 2 hrawngah zung na rat dingmi nicaan aa telmi SMS na hmuh lai.

Zung na rat dingmi nicaan a tlin hlan ni thum ah zung na rat dingmi theihter thannak SMS na hmuh than lai.

Zung na rat dingmi nithla cu na card/catlap a thih nithla he khan aa khat lai. Zung na rat tikah zung chung i luhter na si hlan ah zung ra dingin ca an in kuatmi na SMS kha UNHCR Refugee Centre ah a ummi UNHCR riantuantu na piah hmasa a herh lai. Zung ra dingin khiahpiakmi caan minute 30 nak tuan in zung na rat phan lai.

Ralzam hna le dornak a sawk liomi hna (asylum-seekers)an ngamdamnak caah le siarem tein an umnak caah ti in zung ra dingin nicaan pekmi hna hi a minung zat rikhiah in a si caah zung rat nicaan pek loin na rat ahcun zung chungah luhter na si lai lo.

Na UNHCR card/catlap a thih cang hnu ah SMS na hmuh lo ahcun UNHCR nih an ngeihmi na phone number kha a nung ti lo tinak a si. Na phone number/email/ na umnak address na thlen tik paoh ah Refugee Malaysia Website ahhin update na tuah lai.

A UNHCR card/ catlap thar la dingin nicaan pek i a thi cangmi a card/catlap a rak i kenmi hna lawng UNHCR Refugee Centre chungah luhnak nawlpek an si lai. Zung a lut rih lomi a dang na chungkhat asiloah na chungkhar rak i ratpi hna hlah.

UNHCR Refugee Centre i na rat tikah nangmah tein ti, eidin/rawl na rak i ken lai.

UNHCR Refugee Centre hmai i na um ah siseh asiloah a chung i na um ah siseh na hnawmtam kha hnawmpung ah na hlonh lai.

Biahalnak. Malaysia i UNHCR ah dornak ka sawk khawh ning a si lai?

COVID-19 he pehtlai in tuandeuh i lockdown tuahmi, umkal rikhiah le phihkhamnak, le ram pumpi COVID-19 SOPs zulhphung ruang hna ah hawidang he aa khat lomi dirhmun le sining dah ti lo cu UNHCR Refugee Centre ah mah pumpak in ra dingin UNHCR nih a cohlang kho hna lo. Cucaah, huhphenhnak rianrang in a herh ko tiah nawlnak tuahmi case hngatchan in mithar laknak ding interview tam deuh cu a langhlat in tuah an rak si hna.

September 2021 ah UNHCR Refugee Centre on than a si hnu in le community hna nih nawlnak an tuah bantukin card/catlap a thi cangmi 68,000 hrawng a thar pek thannak ding hi UNHCR nih usape in a tuah i, minung rikhiah in mithar laknak interview zong a thok than. Hawi hlei in harnak a tongmi le huhphenhnak a herhmi hna kha usape an si. Tahchunhnak ah hawi hlei in harnak a tong khomi le huhphenhnak a herhmi ahhin nu si ruangah tihnung dirhmun ah a dirmi hna, ngakchia si ruangah tihnung dirhmun ah a dirmi hna, kum upa cangmi si ruangah tihnung dirhmun ah a dirmi hna, pum tlamtling lomi hna le ngandamlonak fakpi a ngeimi hna, le tlaihkhih a tongmi asiloah mah ram ah kuat than dingmi hna an i tel. Ngakchia, kum upa, nu asiloah fapawi liomi nu paohpaoh hi hawi hlei in huhphenh a herhmi an si dih lo ti na theih lai; nain kum upa cangmi ngandamlonak fakpi a ngei i khulrang in thlawpbul a herhmi hna cu mithar lak dingin ruahpiak khawh an si.

2020-2021 ah a thi cangmi card/catlap (68,000) tamdeuh cu a thar pek than (renewed) an si cang caah a langhlat in min khumh cangmi hna cu an chimmi a hmaan maw hmaan lo tiah zoh nolhnak ngei than dingin le mithar laknak caah interview tuah dingin UNHCR nih zung ra dingin nicaan (appointment) a pek lio hna a si. 2019 hlan asiloah 2019 lioah mithar lak dingin a rak sawkmi hna, asiloah pumpak in tihnung le huhphenhnak a herh khunmi hna, biana ah nu si ruangah a himlomi, ngakchia si ruangah a himlomi, kum upa si ruangah a himlomi, pum tlamtling lomi, ngandamlonak fakpi ngeih ruangah thlawpbul a herhmi, tlaihkhih a tongmi asiloah mah le ram ah kuat than ding mi hna hi mithar laknak dingah usape an si lai. Atu lioah ah cun a rak sawk cangmi paoh khan cun mithar lak dingin tawlrel an si rih lai lo. Ralzam hna ngandamnak le siarem tein an thutto khawhnak ding caah zung rat nicaan pek lawngin mithar laknak hi tuah a si.

Zung ra dingin nicaan pek na si lo ahcun mithar laknak kong ahhin UNHCR Refugee Centre ah zaangfah tein rak ra hlah. Mithar lak dingin interview tuah dingah caan suaipiak na si ahcun zung na rat dingmi nicaan phone in chawnh na si lai, cu hnu ah SMS kuat na si than lai.

Website ah mithar laknak na rak sawk bal cang ahcun, nangmah le midang caah a fumhter deuh lai caah a thar in sawk than ti hlah. Website in mithar laknak na sawk cang ahcun reference number kha print asiloah tha tein fim ding philh hlah.

Mithar laknak interview tuah dingin UNHCR nih an in pehtlaih dingmi kha rak hngak ko. Mithar laknak ding a hngak vemi hi an tam tuk caah hngah caan hi a suanak si.

Mithar laknak interview tuah dingah UNHCR Refugee Centre ah ra dingin nicaan pek na si ahcun zung na rat ni ah khin ti le eidin/rawl na rak i ken lai.

UNHCR Refugee Centre hmai i na um ah siseh asiloah a chung i na um ah siseh na hnawmtam kha hnawmpung ah na hlonh lai.

Biahalnak. Mithar lak dingmi ahhin mi zeidah upase an si lai?

Atu lioah cun 2019 hlan le 2019 lioah a rak sawk cangmi hna le a bikin tihnung dirhmun ah a dirmi hna kha UNHCR nih usa a pek hna. Tahchunhnak ah hawi hlei in harnak a tong khomi le huhphenhnak a herhmi ahhin nu si ruangah tihnung dirhmun ah a dirmi hna, ngakchia si ruangah tihnung dirhmun ah a dirmi hna, kum upa cangmi si ruangah tihnung dirhmun ah a dirmi hna, pum tlamtling lomi hna le ngandamlonak fakpi a ngeimi hna, le tlaihkhih a tongmi asiloah mah ram ah kuat than dingmi hna an i tel. Ngakchia, kum upa, nu asiloah fapawi liomi nu paohpaoh hi hawi hlei in huhphenh a herhmi an si dih lo. Huhphenhnak fakpi a herhmi asiloah a hlei khun in bawmh a herhmi nu/pa cu mithar lak dingah hin ruahpiak an si lai. Tahchunhnak ah kum upa cangmi pakhat ngandamlonak fakpi in a ngeih i khulrang in thlawpbul herhmi a si ahcun mithar lak ding ah ruahpiak a si lai.

Biahalnak. Mithar laknak kongah zung ra dingin nicaan an ka pekmi ni i zung ka rat tikah zeidah ken a herhmi an si?

Na innchungkhar dihlak le na case caah a herhmi ca hna biana ah passport, nangmah na sinak a langhtertu ca (identity paper), thitumhnak lehhmah, nauchuak lehhmah, siizung umnak ca, ingthawngsuh cazin asiloah hmatpungtin, ralkap na tuannak cauk le a hlan ah a dang UNHCR asiloah UNRWA Zung ah na rak luh balnak ca hna na rak i ken dih hna lai. Cun, zung pawngkam ah dawr a um lo caah le zung chungah na hngah dingmi caan hi ruah ning nakin a rauh deuh khawh caah ti le rawl/eidin dingmi na rak i ken lai.

Biahalnak. Keimah cu zung a lut cangmi ka si, nain ka nupi le ka fale (kum 18 tang) belte zung an lut rih lo. Kan nupi le ka fale hi zeitindah zung ka luhter ning hna a si lai?

Refugee Malaysia Website i family composition change tinak zawn ah khan zung luhnak ding sawkpiak hna, asiloah 8:00 am – 4:00pm karlak ah Registration hotline number 017-6143810 ahhin chawn. Cawnnikhat in Cawnninga tiang. Website i family composition change khan na sawkpiak hna ahcun reference number kha print asilole tha tein fim dingin philh hlah. Na file ah na nupi le na fale benh dingah zung ah ra dingin UNHCR nih pehtlaihnak an in tuah te lai. I benhnak nawlmi ni le thla hoih in siseh, pumpak kong ah hawi hlei in tihnung dirhmun ah a dir maw ti zoh in case hna hi tawlrel an si. Ralzam hna ngandamnak caah le siarem tein an um khawhnak ding caah zung ra dingmi zat hi rikhiah in nicaan (appointment) pek an si caah zung ra dingin nicaan pek loin zung na rat ahcun Zung chungah luhter na si lai lo.

Biahalnak: Naite ah khan nau thar ka ngei? Ka fate hi zeitindah ka file ah ka khumh/ benh ning a si lai?

Refugee Malaysia website i family composition change tinak zawn ah khan na fa benhnak caah nawlnak na tuah lai. Website hmang in family composition change ah khan na fa benh dingin nawlnak na kuat ahcun reference number kha na print lai asiloah tha tein na fim lai. Zung ra dingin nicaan pek na si lo ahcun zaangfahnak tein zung ah ra hlah. Ralzam hna ngandamnak caah le siarem tein an um khawhnak ding caah zung ra dingmi zat hi rikhiah in nicaan (appointment) pek an si caah zung ra dingin nicaan pek loin zung na rat ahcun Zung chungah luhter na si lai lo.

Biahalnak: Ka UNHCR card ka thlau. Zeitindah a thar ka lak ning a si lai?

Refugee Malaysia website i report on loss of document ah khan thawng an thanh lai. Website in na card na thlaumi thawng na thanh ahcun reference number kha na print lai asiloah tha tein na fim lai. Thawng na thanh thla khat chungah zung ah ra dingin UNHCR nih an in pehtlaih lai i, card thar pek na si lai.

Biahalnak: Mithar laknak ding ca i ka sawkmi ah siseh, asiloah UNHCR sin in asiloah a ttuanhawi hna sin in bawmhnak ka hal tikah phaisa ka pek hna a herh maw?

Phaisa pek a herh lo. Mithar laknak kong le UNHCR card/catlap i peknak telh in UNHCR le a riantuan hawi hna i an riantuannak paohpaoh cu manpek hau lomi an si dih. UNHCR riantuannak ah mi pakhatkhat nih phaisa an in hal ahcun Online Complaint Form (Fraud & Corruption) asiloah UNHCR Risk, Integration le Oversight Unit i email mlslufrd@unhcr.org ah report na tuah lai.



Share