ပရေင်ပ္တိုန်စရင်ရဳဂျေတ်သတာ ပ္ဍဲယူအာန်အုက်ချ်သဳအာ

စၟတ်တ္ၚဲချိင်ဇကု ပ္ဍဲယူအာန်အုက်ချ်သဳအာ ကၟိန်ဍုင်မလေဝ်ယှာ

အ္ခိင်ရ ယူအာန်အုက်ချ်သဳအာ ကၟိန်ဍုင်မလေဝ်ယှာ ဆက်စၠောံကော်နင်ဖုင်ကဵုဇကု စပ်ကဵုကိစ္စစၟတ်တ္ၚဲချိင်မွဲမွဲတုဲမ္ဂး သွက်သ္ဂောံဆဵုဂဗတက်ကျာဂှ် ပလေဝ်လောတ်စမာန်ရ။ မၞိဟ်အလုံသီုဖအိုတ် အာတ်မိက်ပရေင်ဂီုကၠီုတံဂှ် (သီုပါလုပ်မံင် လၟိဟ်မၞိဟ်ကၟိန်သ္ၚိဂမၠိုင်တုဲ သီုကဵုမၞိဟ်ဗ္ဒဗ္ဒာဲဇကု တၞဟ်တၞဟ်တံမွဲမွဲ) သွက်စၟတ်တ္ၚဲချိင်ပၠောပ်စရင်ရဳဂျေတ်သတာဂှ် ကၠုင်စိုပ်ဂွံမာန်ဖအိုတ် မဒှ်ရ။ အ္ခိင်ပၠောပ်စရင်ရဳဂျေတ်သတာမ္ဂး တင်နင်ဍာံပြ၊ တင်နင်ဓဝ်ဍာံ၊ တင်နင်ဍိုက်ဍိုင်ပေင်ပေင် ဇကုဒးရေင်တၠုင်ကဵုဏောင်ဂှ် ကိစ္စဇၞော်လောန်ရ။ ဟွံသေင်သာ်ဂှ်မ္ဂး တင်နင်ဟွံဍာံပြ၊ တင်နင်ဟွံဍိုက်ပေင်တံဂှ် သ္ပဏာကဵုဝင်ဇကုလီုလာ် ဟွံအံင်ဒှ်မာန်ရ။

အ္ခိင်ပၠောပ်စရင်ရဳဂျေတ်သတာ ပ္ဍဲ UNHCR တုဲဒှ်ဗက်ဂှ် ယူအာန်အိက်ချ်သဳအာ ပ္တိတ်ကဵုဇကု ကာဒ် UNHCR မွဲမွဲ ဟွံသေင်မ္ဂး လိက်တၞးစၟတ်ထံက်ဂလာန်မွဲမွဲ နကဵုစၟတ်တ္ၚဲအယုက် မလုပ်သၞောဝ် စုတ်ကဵုလဝ် မဒှ်ရ။ ကာဒ် UNHCR ဇကုကီု၊ ဟွံသေင်မ္ဂး လိက်တၞးစၟတ်ထံက်ဂလာန် UNHCR ဇကုကီု၊ အယုက်အိုတ်မ္ဂး သွက်သ္ဂောံကလေင်ဆက်အယုက်ဍေံဂှ် သ္ပဂုဏ်တုဲကၠုင်ရုင်ညိ။

သ္ပဟိုတ်နူယဲကပ်ခိုဝ်ဝေဒ်-၁၉ တုဲ သွက်သ္ဂောံကလေင်ဆက် လိက်တၞးစၟတ်ထံက်ဂလာန်ဂှ် ဗွဲလၟေင်မေတ္တာ မင်ကဵု ယူအာန်အုက်ချ်သဳသာ ဆက်စၠောံဏာဖုင်ကဵုဇကုညိ။ ဟွံမွဲကဵုစၟတ်တ္ၚဲချိင်မွဲမွဲမ္ဂး လ္ပကၠုင်ရုင် ယူအာန်အုက်ချ်သဳအာညိ။

လိက်တၞးစၟတ်ထံက်ဂလာန် မ္ဒးနွံပၟိက်

တၞးလိက်စၟတ်ထံက်ဂလာန် မဆက်စပ်ကဵုကိစ္စဝင်ဇကု အလုံသီုဖအိုတ်ဂှ် မပ္တံ လိက်အုပ်ဖါတ်သပတ်ကီု၊ တၞးလိက်ထ္မံက်ထ္ၜးသက်သဳဂမၠိုင်ကီု၊ လိက်ကသုက်မ္ၚဵုထပ်တဲကီု၊ လိက်ကသုက်က္တဵုဒှ်မၞိဟ်ကီု၊ စရင်ကၟိန်သ္ၚိကီု၊ ကာဒ်စၟတ်ကောန်ဍုင်ကီု၊ တၞးလိက်စၟတ်ရေင်တၠုင် ပၞာန်ကၟိန်ဍုင်ကီု၊ လိက်စၟတ်သမ္တီပရေင်ထတ်ယိုတ်ဂမၠိုင်ကီု၊ လိက်သက်သဳသာဓက ပၠောပ်လဝ်စရင်ရဳဂျေတ်သတာ မွဲအ္ခိင်တေံ ပ္ဍဲရုင် UNHCR တၞဟ်တၞဟ်တံကီု၊ ပ္ဍဲရုင် UNRWA တၞဟ်တၞဟ်တံကီု၊ ဟွံသေင်မ္ဂး ပ္ဍဲအလဵုအသဳဍုင်သ္အာင်မွဲမွဲကီု၊ သ္ပဂုဏ်တုဲ ကေတ်နင်ဖအိုတ်ညိ။

တၞးလိက် UNHCR ပ္တိတ်ကဵုလဝ်ဂမၠိုင်ဂှ် မပ္တံ ကာဒ်ထ္မံက်ထ္ၜးစၟဳစၟတ်ဇကုဇကုကီု၊ တၞးလိက်(UC)အဃော စင်ခြာဖျေံသ္ဂုတ်သွာတ်ကီု၊ ကာဒ်စၟတ်တ္ၚဲချိင်ကီု၊ တၞးလိက်ကဵုလဝ် သွက်စၟတ်တ္ၚဲချိင်ကီု သ္ပဂုဏ်တုဲကေတ်နင်ဖအိုတ်ညိ။ တၞးလိက်ထံက်ဂလာန်ဂွံဒုင်ကေတ်လဝ်တဲ သ္အာင်နူရုင် UNHCR ကၟိန်ဍုင်မလေဝ်ယှာတံဂှ် ပ္တိုန်ထ္ၜးဂွံမာန်ကီု မဒှ်ရ။

ပရေင်ပ္တိုန်စရင်ရဳဂျေတ်သတာ ကောန်ဇာတ်ဇကု

ယဝ်ရဇကု ဆဂွံကလိဂွံလဝ်ကောန်ၚာ်မ္ဂး တၞဟ်နသ္ဂောံကလိဂွံ လိက်ကသုက်ကောန်ၚာ်က္တဵုဒှ်မၞိဟ် ကောန်ဇာတ်ဇကုဂှ် ဇကုထေက်ကဵု ဒးပ္တိုန်စရင်ရဳဂျေတ်သတာ ကောန်ဇာတ်ဇကု ပ္ဍဲဌာနပ္တိုန်စရင်ရဳဂျေန်သတာ အလဵုအသဳကၟိန်ဍုင် National Registration Department (NRD) မဒှ်ရ။ ကောန်ၚာ်သၠးပဋိသန္ဓိတုဲ အပ္ဍဲပွိုင် ၆၀ တ္ၚဲ ယဝ်ရဇကုပ္တိုန်စရင်ရဳဂျေတ်သတာမ္ဂး ဟွံဒးကဵုစရိတ် ပ္ဍဲဌာန NRD မဒှ်ရ။ ဆ္ဂးဗီုလဵုဒှ်ဒှ် လက်ကရဴနူ ၆၀ တ္ၚဲတုဲတုဲ ဟိုတ်နူပရေင်ပ္တိုန်စရင်ရဳဂျေတ်သတာလဇုဲဂှ် ဇကုဒးကဵုစရိတ် ဒှ်မာန်ရ။

ကာဒ်ကေုာံလိက်စၟတ်ထံက်ဂလာန် ယူအာန်အုက်ချ်သဳအာ

အတိုင်နွံပၟိက် ပရေင်ဂီုကၠီုဂၠးကဝ်တုဲ ဇၟာပ်ဇၟာပ်မၞိဟ် ညးမလုပ်လဝ်စရင်ရဳဂျေတ်သတာ ပ္ဍဲလၟေင်ကမၠောန် UNHCR မရေင်တၠုင်ကဵုလဝ်ကာဒ် UNHCR မွဲမွဲကီု ဟွံသေင်မ္ဂး တၞးလိက်ထံက်ဂလာန်မွဲမွဲ ထ္မံက်ထ္ၜးလဝ် ညးမရပ်လဝ်ကာဒ်ကီု ဟွံသေင်မ္ဂး ညးမရပ်လဝ် တၞးလိက်ထံက်ဂလာန်ကီု နွံမံင်သၟဝ်ပရေင်ဂီုကၠီု UNHCR မဒှ်ရ။