Jun Mácor ek tarík 2022 oíte, UNHCR re noiya gorí rejisthrecén ar tarík mori giyói de habosfonna ókkol ólla tarar torika ókkol noyagoijjé. Meérbanigorí torika iín or baboote barbár súal ókkol fusárgoijjede iín or juab ókkol eçe tuaisoó.
Q. Añár UNHCR kad yato habosfonnar tarík mori giyói yato toratori mori zaibuo goi. Añí kengóri yian noyagori yum ?
Tuáñr habosfonnar miyad fúrai zaibar dui háftaage , tuñí tuáñr epuaimén arde tarík lói ekkan SMS faiba.
Tuñí epuaimén or tin din age aro ekkan yiadgoráidibar SMS faiba.
Epuaimén or tarík aámhísafe zedin tuáñr habosfonnar tarík mori zaibo goi é din oíbo. Epuaimén or tarík or din , Tuáñre bútore gólito ejazot dibar age UNHCR Refuji senthár ot maze UNHCR or soñijja re fakka góijja SMS san dáho. Meérbanigori tuáñr epuaimén or 30 miníth age senthár ót maze aiba.
Tuáñre senthár ot maze epuaimén sára gólito ajazot noó dibo kíallahóile Refuji arde sáara tuoya ókkol or sehét ar bálaiyi re fakka gorí bellá epuaimém or nombór ókkol thíkgora giyé.
Tuáñrtu zodi tarík mori giyégói de UNHCR or habosfonna táke ar tuñí ekkan SMS noó foóde oíle, yian or mani oílde UNHCR or hañse tuañr telifún nombór rekodh goijja ar sóiyi nai. Zehon tuñí tuáñr fún nombór /iméil/tákede zagar thíkana bodolo, meérbanigori Refugee Malaysia wébsáith or zoríya yian noya gorí difaríba.
Seríf zonfoti manúic UNHCR or habosfonna noya gorí bellá epuainmén lói ar ítarar fúañtí tarík mori giyói de habosfonna ókkol lói aiccéde, ítara re UNHCR Refuji Senthár ot maze gólibar ajazot diya zaá. Meérbanigorí tuáñr fúañtí oinno rejísthar sára fémlir membór yato egana ókkol noó ainno.
Zehon tuñí ekkan epuainmén lói UNHCR or Refuji Senthár ót aiba,meérbanigorí tuáñr nizor fani ar fiça/ hánar dhabba ókkol aniba.
Zehon tuñí UNHCR or Refuji Senthár ar/yato Senthár or bútore takíba,meérbanigorí tuáñr furari giín sátar dhabba maze félai doó.
Q. Añí kengorí Malaysia UNHCR lói ekzon saára tuoya hísafe rejisthar gori fari yum?
Agor Kovid-19 or baabote lockdown,lorasorar paabondi ar koumi kovid-19 or SOP ókkol ólla UNHCR re bekaida háalot sára UNHCR or Refuji Senthar ot zonfoti manúic gosíloi noó fare. Endilla, refuji rejisthrecén intarbyu ókkol becbák matár uore aiyérde hótara ókkol ore hefazotgorí bellá endhilla keis ókkol jolti zorurot óile duró otti tái góra oó.
2021 sálor séptembor mac ot UNHCR re Refuji Senthar abbar kúler fore, ar kommunity’r aros lói,UNHCR re tokoriban Só azár añctho cót foijjonto (68,000 ) tarík mori giyóide kad agortú noya gori debellá mouka diyé.Baade, hom híssa manúic ore rejisthrecén intarbyu ókkol dubra cúru goré. Háasgorí komzur manúic ókkol ore agortú mouka diya giyé. Endilla komzur manúic ókkol mesál ot aséde, hótara at maze aséde beçiáin ókkol,hótara at aséde gura fuain ókkol, hótara at aséde burá manúic ókkol, mazur manúic ar hótara biaram,ar dórafora yato decórtu neelaidibar dhoror hálot ot maze aséde manúic ókkol. Meérbanigori monot rakíbade gura fuain,burá manúic,beçiáin ar hámil miala ókkol beggún komzur bouli bafa noó zaibou lékin zodi ekzon burá manúic ottú hótara biaram asé ziyan ór jolti elaj or zorurot óo,toile hítare/íbare rejisthar gori bellá bafa zait fare.
2020-2021 sál loti tarík mori giye góide becbák habosfonna(68,000) noya goridiya giyé, ehon UNHCR re zonfoti epuainmén ókkol diya cúru goijje táke dúro ottú rejisthar goijje de manúic ókkol ore tosdikgori ar rejisthrecén intarbyu ókkol cúru gori bellá. 2019 Sál ot yato tar age aros goijje de manúic ókkol arde/yato háasgorí komzur manúic ókkol zendila neki hótara at maze aséde beçiáin ókkol,hótara at aséde gura fuain ókkol, hótara at aséde burá manúic ókkol, mazur manúic ar hótara biaram,ar dórafora yato decórtu neelaidibar dhoror hálot ot maze aséde manúic ókkol agortu mouka diya zaibou. Zara rejisthrecén ólla dorhás goijje tara fottízon ore e tháim ot karwaiyi gora noó zai bou. Refuji ókkol or sehét ar balaiyí fakka gori bellá,rejiathrecén seríf epuainmén or zoriya gora óibo.
Tuáñrtu zodi epuainmén noó tákede óile meérbanigori noya rejisthrecén ólla UNHCR or Refuji Senthar ot maze noó aicco. Tuñí epuainmén ólla uggwá koll faiba tarfore tuáñr ólla zodi uggwá rejisthrecén intarbyur thaim mokror góille tuñí ekkan fakka sms faiba.
Zodi tuní wébsáith or zoriya rejisthrecen ólla aros gori tákile, dubara ar rejisthrecén ólla dorhás zoma noó diyío kiállahoilé yian e tuáñr ar oinno manúic ókkol or karwaiyi re deri gori bou. Zodi tuñí wébsáith or zoriya rejisthrecén ólla dorhás gori tákile meérbanigori taaluki nombór gwá sábaiyore neelo yato raki doó.
Uggwá rejisthrecén intarbyu ólla UNHCR re zugazuk gori bellá meérbanigori entezargoró. Éçe becbák manúic rejisthrecén ólla entezargorer étolla entezar or thaim óilde lamba.
Zehon tuñí uggwá rejisthrecén intarbyu ólla UNHCR ór refuji Senthar ot aibar epuainmén or tarík fai félaiba ,meérbanigorí epuainmén or din tuáñr nizor fanir dhabba ar fiça /hána ókkol lói aicco.
Zehon tuñí Senthar or sámmottú ar senthar or bútore taiba,meérbanigori tuáñr sáta giín sátar dhabba maze félai doó.
Q. Noya rejisthrecén ólla hontará re agortu mouka dia zaibou?
UNHCR e ehon rejisthar gorerde zara 2019 or age yato 2019 ot rejisthar goribar aros foóñsaiye ítara re, háasgori komzur manúic ókkol. Mésal hísafe,hótara at aséde beçiáin,hótarat aséde gura fuain ókkol, hótarat aséde búra manúic ókkol, mazur manúic ar hótara biaram,ar dórafora yato decórtu neelaidibar dhoror hálot ot maze aséde manúic ókkol ore agortu mouka diya zaibou. Fuain beggún,burá manúic,beçiáin,yato hámil miala ókkol beggún ore komzur yato hótarat maze báfa noó zaa. Seríf tara ódor baára héfazot or hótarar mukabela óile yato aro háas zorurot tákile,híte/íba re registhrecén ólla báfa zaibou. Mesál hísafe,zodi uggwá burá manúic ottú hótara biaram asé ziyan ólla jolti elaj or zorurot óo,toile híte/íba rejisthrecén ólla báfa zait fare.
Q: Añár registhreceén epuainmén ot añártu ki ana foribou?
Meérbanigori tuáñr fémlir membór beggún ar tuáñr keis or mutaalek habosfonna beggún zendila neki, paáspóuth,sinnor habosfonna ókkol, biyár sáltikat, zormor sáltikat,hóspital or habosfonna,gór habos(sensar habos)yato decóitar sinnor habosfonna,milithírir hédmot or gura kitab ókkol ar agor oinno UNHCR arde /yato UNRWA ofisor rejisthar óiyióde sábut tákile aniba. Aro, meérbanigori tuáñr fanir dhabba ókkol ar hána/fiça ókkol ofis ot aniba, kiállahoilé atehañsé honó duan faa noó zaibou ar ofis ot entezar or thaim tuñi acá gorodde yiato bare bicí lamba óit fare.
Q:Añí foóila loti rejisthar óiyi,mogor añár bou arde fuain ókkol añçaro(18) bosór or nise nai. Ken gori añí añár bou arde fuain ókkol ore rejisthar gori yum?
Meérbanogori Refugee Malaysia website or zoriya fémli banai bellá ekkan dorhás zoma doó yato beinna añctho wattu lota házinna sair gwá foijjontu rejisthrecén hótlain 017-6143810 nombór ot call goro. Cómbar ottú lota Cúkkubar foinjjontu Zodi tuní wébsáith or zoriya fémli banai bar ekkan aros zoma di takile ,meérbanigori fakka gori bellá taaluki nombór gwá sábai rako. Tuáñr bou arde fuain dore tuáñr fáil ot golai bellá UNHCR ór torfottu tuáñr lói zugazuk gori bou. Añára aros faibar tarík or uore darmudar gori ar háas gori manúic giín komzur ne noó yian or uore darmudar gori añára endilla keis ókkol ore karwaiyi gori. Añára aros faibar tarík or uore darmudar gori ar háas gori manúic giín komzur ne noó yian or uore darmudar gori añára endilla keis ókkol ore karwaiyi gori.
Q: Añártu uggwá édinna noya fua óiye. Añí kengori añár fua wa re fáil ot gólai yum?
Meérbanigori Refugee Malaysia website or zoriya fémli banaibar tobdílir baabote ekkan aros zoma doó. Zodi tuní wébsáith or zoriya fémli banai bar ekkan aros zoma di takile ,meérbanigori fakka gori bellá taaluki nombór gwá sábai rako. Zodi tuáñrtu epuainmén noó takile meérbanigori ofis ot noó aicco. Añára aros faibar tarík or uore darmudar gori ar háas gori manúic giín komzur ne noó yian or uore darmudar gori añára endilla keis ókkol ore karwaiyi gori.
Q: Añí añár UNHCR kad gan háñzaifélaiyi. Añí ken gori bodoilla ekkan kad faiyum?
Meérbanigori Refugee Malaysia website or zoriya ekkan habosfonna háñzigiyói de ekkan repouthzoma doó. Zodi tuñí ekkan habosfonna háñzi giyói de repouth zoma dile, meérbanigori taaluki nombór gwá sábai raki doó. Uggwá diya giyede epuainmén tarík ot ek mácor bútore ofis ot aibellá UNHCR or torfottu tuáñr lói zugazuk gora zaibou,zeçé tuáñre bodóille kad gan neelai diya zaibou.
Q. Rejisthrecén dorhás ólla yato UNHCR/yato tarar pathnár tonzim ókkol ottú modot saibar cómot añártu thiñya diya fori bou neki?
Noó Rejisthrecén or hédmot ar UNHCR or habosfonna uddá, UNHCR arde tarar pathnár tonzim ókkol hédmot beggún maana. Honíkka ye zodi UNHCR or hédmot ólla tuáñrtu thiñya magile,meérbanigori yian onlain cékayot fórom or zoriya ( dúkabaazi & fokkorai) baabote repouth gori doó yato UNHCR hótara,milaidoón ,ar negarani gorede Unit ore mlslufrd@unhcr.orgiméil nombór ot iméil gori doó.